जनकपुरधाम । सर्लाहीमा नेपाली कांग्रेसको वडा अधिवेशनको क्रममा गोली चलेको एक दिन नबित्दै फेरी सोही पालिकाको अर्का वडामा ठाउँमा कार्यकर्ताहरुबीच झडप भएको छ ।
सर्लाहीको निर्वाचन क्षेत्र ४ बलरा नगरपालिका ८ मा भएको सो झडपमा परी निर्वाचन अधिकृत उमेश मिश्रा र ७ जना प्रहरी सहित १० जना घाइते भएको छ । जिल्ला प्रहरी कार्यालयका प्रमुख कृष्ण प्रसाईले दिएको जानकारी अनुसार झडपमा परेर जनता मावि फुलपरासीका मतदान अधिकृत झा सहित एक इन्सपेक्टर, सई, हवलदार र जवान ७ जना प्रहरी र दुई जना सर्वसाधारण घाइते भएको हो ।
झडपमा घाइते भएका निर्वाचन अधिकृत र इन्सपेक्टको उपचार मलंगवा स्थित जिल्ला अस्पतालमा भइरहेको छ भने अन्य घाइतेको उपचार स्थानीय स्वास्थ्य चौकीमा भइरहेको प्रमुख प्रसाईले जनाएको छ । उनका अनुसार घाइते प्रहरीहरुमा इन्सपेक्टर सुरेश ठाकुर, सई अरुण कुमार यादव, हवलदार अवधेशप्रसाद यादव, महेशप्रसाद यादव र प्रहरी जवानहरु मेआज आलम, रामानन्द यादव अजय साह रहेको जनाएको छ ।
कार्यकर्ताहरुले मतदान अधिकृत उमेशचन्द्र झामाथी आक्रमण गरेपछि प्रहरीले बचाउन खोज्दा प्रहरी सहित कार्यकर्ताहरु घाइते भएको जिल्ला सभापति नागेन्द्र यादवले बताएका छन । उनका अनुसार निर्वाचन अधिकृतको टाउकोमा चोट लागेको छ भने इन्सपेक्टरको हात भाँचिएको छ ।
प्रतिनिधि सभा सदस्य अमरेश सिंह र प्रदेश २ का महिला बालबालिका तथा खेलकुद मन्त्री विरेन्द्र सिंह पक्षबीच सो झडप भएको हो । अमरेश सिंह पक्षधरले मतदान अधिकृतलाई कुटपिट गर्न थालेपछि प्रहरीले उनको सुरक्षा गर्न खोज्दा स्थानीय कार्यकर्ता र प्रहरी बीच झडप भएको सभापति रायले भने ।
यो विषयमा आफ्नो प्रतिक्रिया दिनुहोस् !