जनकपुरधाम । पार्टी विभाजनको ठुलाे असर जनकपुरधाम उपमहानगरपालिकामा परेका छ । पार्टी विभाजनले अल्पमतमा परेका मेयर लालकिशाेर साह गत ५ महिनादेखि बोर्ड बैठकबाट भाग्दै छन ।
तात्कालिन राष्ट्रिय जनता पार्टीबाट निर्वाचित मेयर लालकिशोर साह अधिकांश सदस्य सोही पार्टीबाट निर्वाचित भएको कारण बहुमत थिए । राजपा र सपा एकीकरण भई जसपा निर्माण भएपछि थप मजबूत बन्यो । तर जसपा विभाजनले मेयर साह जसपामा र अधिकांश सदस्य लोसपामा गएपछि अल्पमत परेको छ ।
उपमहानगरपालिकाको ३५ सदस्य मध्ये अहिले लोसपासँग मात्रै १८ वटा छन भने कांग्रेस सँग ७ र एक÷एक वटा स्वतन्त्र र एमालेका छन । अहिले जसपा आबद्ध मेयरसँग मात्र ८ सदस्य रहेका छन । हुनत कांग्रेसबाट केही सदस्यको समर्थन रहेपनि केन्द्रिय गठबन्धन अनुसार मेयरसँग मुश्किलले १५ सदस्य छन भने लोसपासँग स्वतन्त्र र एमाले सहित २० सदस्य छन । बहुमतका लागि १८ सदस्य चाहिन्छ ।
अल्पमत मै परेको कारण मेयर साहले सरसफाई शिर्षकमा गर्दै आएको भ्रष्टाचार उजागर हुने डरले लिखित तथा मौखिक रुपमा ताकेता गर्दा पनि बोर्ड बैठक बसाउन आलटाल गर्दै आएको आरोप वडाध्यक्षहरुको रहेको छ ।
बोर्डको बैठक बस्न नसक्दा महिनौदेखि नगरका सरसफाईदेखि योजना वितरण तथा कार्यान्वयन र आर्थिक कारोबार समेत प्रभावित भएको छ बोर्ड सदस्य जनकपुरधाम उपमहानगरपालिकाका वडा नम्बर ७ का अध्यक्ष जानकीराम साहले बताए । उनले भने बैठकमा पहिलो मुद्दा नै हाम्रो सरसफाईमा गरिएको खर्च हिसाब सार्वजनिक र सरसफाई व्यवस्थापनको रहनेछ ।
लोसपा आबद्ध बोर्ड सदस्य रहेका वडाध्यक्षहरुले पटक पटक प्रदर्शनका साथै पछिल्लो पटक दुई साताअघि उपमेयर रीता मिश्रलाई संयुक्त रुपमा ज्ञापन पत्र बुझाएपनि कुनै चासो नलिइएको गुनासो गरेका छन । सरसफाईको नाममा आफूले गर्दै आएको भ्रष्टाचार लुकाउनबाट डराएर बहुमत आभावमा मेयर साहले ५ महिनादेखि बोर्ड बैठक नबसाएको जनकपुरधाम उपमहानगरपालिका वडा नम्बर ४ का अध्यक्ष सुदर्शन सिंहको आरोप रहेको छ ।
उनले भने महिनौदेखि नगरको सरसफाई हुन नसक्दा आफू जनताबाट गाली परिरहेको अवस्थामा बोर्ड बैठक बसाएर समस्या समाधानका लागि पटक पटक आग्रह गर्दा पनि आफूले गरेको भ्रष्टाचारको कारण नाँगेझार हुन सक्ने डरले मेयर साह पन्छिन खोजेको भने ।
त्यस्तै वडा नम्बर ३ का अध्यक्ष दिपेन्द्र साहले पनि करारमा राखिएको कर्मचारीको तलबबाट कमीशन र महिनौदेखि नगरको सरसफाई नहुँदा पनि सरसफाईको नाममा प्रति महिना २०÷२५ लाख रुपैया गर्दै आएको भ्रष्टाचारको पोल खुल्न सक्ने डरले बैठक नबसाएको आरोप लगाए ।
उनले भने पहिला मेयर साह बहुमतमा हुँदाखेरी भ्रष्टाचारलाई ढाकछोप गर्दै आएको थियो । आफूहरुले केही आवाज उठाएपनि बहुमतको आधारमा निर्णयहरु पारित गथ्र्यो तर अब बहुमत गुमेपछि डरले बैठक बसाउन मेयर नचाहेको हो ।
यता लोसपाबाटै उपमेयर रहेकी रिता मिश्रले पनि बहुमतको डरले मेयर साहले बैठक बसाउन नसकेको आरोप लगाएकी छिन । उनले भनिन् केही दिनअघि वडाध्यक्षहरुले बुझाएको ज्ञापन पत्र दिएर बैठक आह्वान गर्न दबाव दिएपनि वास्ता गरेनन् ।
उनले भनिन् बोर्ड बैठकमा ढिलाई पहिला पनि हुन्थ्यो तर यति लामो हुन थिएन । बैठक ढिला हुँदै गएपछि मलाई नै अधिकार दिनथ्यो । तर अहिले म सँग बहुमत भएको कारणले पनि अधिकार नदिएको हुन सक्छ ।
यस सम्बन्धमा प्रतिक्रिया लिन मेयर साहलाई दुई दिनदेखि पटक पटक फोन गर्दा पनि सम्पर्क हुन सकेन ।
यो विषयमा आफ्नो प्रतिक्रिया दिनुहोस् !