जनकपुरधाम । मुख्यमन्त्री कार्यालयद्वारा खरीद गरिएका साइकलमा अनियमितता देखिएकाे अख्तियार दुरूपयाेग अनुसन्धान आयाेगकाे अभिव्यक्तिप्रति प्रदेश २ सरकारले आपति जनाएका छन ।
साेमवार संचारकर्मी संग कुरा गर्दै अख्तियार बर्दिबास कार्यालयका प्रमुख कृष्णप्रसाद सापकाेटाले छात्राकाे वितरणका लागि मुख्यमन्त्री कार्यालयद्वारा खरीद गरिएकाे साइकलकाे प्रारम्भिक अनुसन्धानमा अनियमितता भएकाे देखिएकाे बताएका थिए ।
प्रारम्भिक निष्कर्ष भन्दै पूर्वधारणा र दुराग्रह अभिव्यक्त हुनेगरी मातहतका तर अनाधिकृत निकायबाट आएको अभिव्यक्ति गलत, अपरिपक्व र भ्रामक रहेको प्रदेश २ सरकारका प्रवक्ता एवम् अर्थमन्त्री शैलेन्द्रप्रसाद साहले बताएका छन् ।
प्रदेश २ सरकारको ‘बेटी पढाउ, बेटी बचाउ’ कार्यक्रमअन्तर्गत भएको साइकल खरिदमा प्रारम्भिक चरणको अनुसन्धानबाट भ्रष्टाचार भएको देखिएको आयोगका बर्दिवास प्रमुख कृष्णप्रसाद सापकोटाले दिएको अभिव्यक्तिमा सरकारका प्रवक्ता साहले यस्ताे आपति जनाएका हुन् ।
उनले भने, ‘संवैधानिक निकायमा कार्यरत कर्मचारीबाट यस्तो पूर्वाग्रह प्रेरित अभिव्यक्तिको अपेक्षा गर्न सकिन्न । यदि समाचारहरूमा आएझैं अख्तियारका बर्दिवास प्रमुखले त्यस्तो भन्नुभएको हो भने त्यो अभिव्यक्ति अनुसन्धानको सिद्धान्त र कानुन विपरीत छ ।
मन्त्री साहले कुनै पनि विषयमा आयोगले अनुसन्धान गर्ने विधि तथा अभियोजन गर्ने प्रक्रिया ऐन कानुनबाट निर्देशित रहेको भन्दै अभियोजनपछि विशेष अदालतले मात्र भन्न सक्ने कुरा अख्तियारका एउटा एकाइ प्रमुखबाट आउनु दुर्भाग्यपूर्ण भएको भने ।
उनले भने, ‘साइकल खरिदसम्बन्धी विषयमा कसैसँग सोधपुछ वा बयानसम्म नभइसकेको अवस्थामा आयोगका बर्दिवास प्रमुखको भ्रष्टाचार भएको प्रारम्भिक निष्कर्षसम्बन्धी धारणाले सम्मानित अदालतको अधिकारक्षेत्र प्रभावित गरेको छ । सरकारको छवि धमिल्याउन आएको त्यो अभिव्यक्ति खेदजन्य रहेकाे छ ।’
अनुसन्धानपछि अभियोजन गर्ने वा नगर्ने अधिकार आयोग अर्थात् प्रमुख आयुक्तसहित आयुक्तहरूको हुने हुँदा बर्दिवास प्रमुखका कथित भनाइ आपत्तिजनक र आफ्नै संस्थाको मान्यताविरुद्धमा रहेको प्रदेश सरकारको ठहर रहेको प्रवक्ता साहले भने ।
कार्य क्षेत्राधिकार नाघेर आयोगका बर्दिवास प्रमुखको अभिव्यक्ति बारे जानकारी प्राप्त गरी त्यस विषयममा आवश्यक सचेतताका लागि मातहतका कार्यालयलाई निर्देशन दिन अख्तियार दुरुपयोग अनुसन्धान आयोगको ध्यानाकर्षण गराइने प्रवक्ता साहले बताए ।
यो विषयमा आफ्नो प्रतिक्रिया दिनुहोस् !