जनकपुरधाम । बलिउड किंग अमिताभ बच्चन हिन्दी फिल्म उंचाईकाे छायाङ्कनका लागि नेपाल आउने भएका छन्।
अमिताभ बच्चन संगै डैनी समेत नेपाल आउनेछ तर कहिले आउने मिति निर्धारण गरिएकाे छैन ।
हुनत उक्त फिल्म सुटिङका लागि अनुपम खेर, बोमन इरानी र परिणीति चोपडा अघिल्लै हप्ता नेपाल आएका छन् । नेपाल आएर उनीहरु हेलिकप्टरमा अहिले नाम्चे पुगेका छन् ।
अनुपम खेरले नेपाल आएको भोलिपल्टै काठमाडौंमा पशुपतिनाथ मन्दिरको दर्शन गरेका थिए । अहिले नाम्चे पुगेर उनले नेपाल अति नै सुन्दर रहेको बताएका छन् । उनले आफूले अहिले देखिरहेको नेपाली भूभाग अभूतपूर्व रहेको समेत उल्लेख गरेका छन्।
उचाइको सुटिङ लुक्ला,लाङटाङ, मनाङ,मुस्ताङलगायत अधिकांश उच्च हिमाली भूभागमा हुने फिल्मका निर्देशक सुरज बडजात्याले जनाएकाे छ ।
अमिताभले नेपालमा ४० देखि ४५ दिन बिताउने सेड्युल रहेको नेपालको लाइन प्रोड्युसर कम्पनी थ्री व्हिलर्स फिल्म्सका सुरज आचार्यले बताए । उनकै कम्पनीले विगत तीन वर्षदेखि भारतीय फिल्म कम्पनीसँग कुराकानी अगाडी बढाएको थियो ।
‘यो प्रोजेक्टका लागि तयारी थलिएको लामो समय भइसकेको छ । उहाँहरु एकपटक आएर बुझेर फर्किसक्नुभएको छ,’ लाइन प्रोड्युसर आचार्यले भने, ‘मैले बारम्बार नेपालमा पनि विदेशको झैँ लोकेसन छ भनेर बलिउडका फिल्मकर्मीलाई भन्ने गरेको थिएँ, फिल्मको काम कोरोनाले गर्दा केही समय ढिलो भयो ।’
सुरजले राजश्री फिल्म्सले नेपालमा छायांकन सकेसंगै बलिउडबाट अन्य धेरै फिल्म छायांकनका लागि आउने संकेत गरे । ‘धेरै प्रोडक्सन हाउससँग कुराकानी भइरहेको, केवल खाँचो छ त सुरुवातको,’ उनले भने ।
फिल्ममा डैनी डेन्जोंगपाको पनि मुख्य भूमिका रहनेछ । चारजनाको मित्रताको कथा नेपालको हिमाली भेगमा बसोबास गर्ने डेनीसँग जोडिएर सुरु हुने बुझिएको छ । फिल्मको छायांकन हिमाली भेगमा हुँदा त्यसले पर्यटनमा टेवा पुर्याउने ट्रेकिङ गाइड तिलकराम राईले बताए ।
यो विषयमा आफ्नो प्रतिक्रिया दिनुहोस् !