जनकपुरधाम, भदौ १५ गते । नयाँ दल दर्ता गराएका दलहरुका लागि प्रदेश २ मा दल सनाखत शुरु भएको छ । लोसपाका लागि धनुषा र महोत्तरीमा मात्रै १ सय ५६ जनाले सनाखत गरेका छन ।
नेकपा एकीकृत समाजवादी र लोकतान्त्रिक समाजवादी पार्टीका लागि आजदेखि प्रदेशस्तरीय सनाख्त शुरु भएको हो । मंगलवार जसपाबाट अलग भएका लोसपाका लागि पुर्व राजपाका स्थनीय तह जनप्रतिनिधिहरुले सनाखत गरेका छन भने एमालेबाट नेकपा एकीकृत समाजवादीमा गएकाहरुले बुधवार सनाखत गर्नेछ ।
भदौ १५ गतेदेखि २२ गतेसम्म दल सनाखतका लागि समयावधि तोकिएकोमा आज पहिलो धनुषामा पुर्व राजपाका १ सय १२ जनप्रतिनिधि ५४ जना सनाख्त गरेका छन । निर्वाचन आयोगले नयाँ दलमा प्रवेश गरेको जानकारी दिन आफैं निर्वाचन कार्यालय पुगेर सनाखत गर्नुपर्ने व्यवस्था अनुरुप जनप्रतिनिधि स्वयं उपस्थित भएर सनाखत गरेका छन ।
त्यस्तो महोत्तरीमा पुर्व राजपाका २ सय १५ जनप्रतिनिधि रहेकोमा १ सय २ जनाले सनाख्त गरेका छन भने सप्तरी, पर्सा र सर्लाहीमा सनाख्त हुन सकेको छैन । उता सिरहामा एमालेबाट एकीकृत समाजवादीमा गएका एकजना वडाध्यक्षले सनाखत गरेको छ भने बारामा लोसपा र एकीकृत समाजवादी गरी ७८ जनाले सनाखत गरेका छन ।
धनुषाको १८ स्थानीय तह मध्ये मेयर/उपमेयर १२/१२, अध्यक्ष/उपाध्यक्ष ६/६, वडाध्यक्ष १ सय ६९ र सदस्यहरु ६ सय ४३ जना गरी ८ सय ४८ जना जनप्रतिनिधि रहेको छ । जसमध्ये तात्कालिन राजपाबाट मेयर/उपमेयर २/२ जना, वडा अध्यक्ष २१ र सदस्यहरु ८७ जना गरी १ सय १२ जना जनप्रतिनिधि रहेको थियो । जसमध्ये जनकपुरधाम उपमहानगरपालिकाका मेयर लालकिशोर साह राजपाबाट जितेपनि जसपामा गइसकेको छ ।
हालको जसपा रहेको पुर्व समाजवादी पार्टीबाट धनुषा जिल्लामा मेयर, उपमेयर र उपाध्यक्ष गरी ३ जना, वडाध्यक्ष २३ र सदस्यहरु १ सय ८ जना गरी १ सय ३४ जना सदस्य रहेको थियो । सपा र राजपा एकीकृत भई जसपा हुँदा धनुषामा मेयर ३, उपमेयर २, अध्यक्ष/उपाध्यक्ष १/१ जना, वडा अध्यक्ष ४४ र सदस्यहरु १ सय ९५ गरी कुल २ सय ४६ जना जनप्रतिनिधि रहेको थियो । प्रदेश २ मा पुर्व राजपाको १ हजार १ सय ११ र सपाको १ हजार ५७ गरी एकीकृत जसपाको २ हजार एक सय ६८ जनप्रतिनिधि निर्वाचित रहेको थियो ।
यही भदौ २ गते एमाले विभाजन भएर माधवकुमार नेपाल नेतृत्वको नेकपा एकीकृत समाजवादी र जनता समाजवादी पार्टी विभाजन भएर महन्थ ठाकुर नेतृत्वमा लोकतान्त्रिक समाजवादी पार्टी भन्ने नयाँ दल दर्ता भएको थियो ।
सो दलहरुलाई निर्वाचन आयोगले भदौ २२ गतेसम्म दल सनाख्त गर्न समयावधि दिइएको छ । प्रतिनिधि सभा सदस्य र कार्यकारिणी सदस्यहरुले भदौ ९ गते निर्वाचन आयोगको केन्द्रिय कार्यालयमा दल सनाख्त गरेको थियो । आजदेखि नयाँ पार्टी प्रवेश गर्ने जनप्रतिनिधिको सनाखत हुन थालेको प्रदेश निर्वाचन कार्यालय कार्यालय प्रमुख पुष्पा झाले बताएकी छिन । प्रदेश निर्वाचन कार्यालय रहेको ठाउँमा स्थानीय तहका जनप्रतिनिधिको सनाखत पनि प्रदेश कार्यालयले नै गर्ने व्यवस्था मिलाइएको उनले जानकारी दिइन् ।
त्यस्तै, एमाले छोडेर एकीकृत समाजवादीमा गएका प्रदेश सांसदहरुले बुधबार निर्वाचन कार्यालय पुगेर सनाखत गर्नेछ भने लोसपाका प्रदेश सांसदहरुले बिहीवार सनाखत गर्नेछ ।
लोसपा प्रदेश सांसदहरुले पार्टी शिर्षस्थ नेताहरुसँगको छलफल पश्चात सनाखत गर्ने तयारी रहेकोले बिहीवारको समय लिइएको लोसपा प्रदेश सांसद परमेश्वर साहले बताए । बुधवार सो छलफलका पार्टी अध्यक्ष महन्थ ठाकुर, वरिष्ठ नेताद्वय राजेन्द्र महतो र शरतसिंह भण्डारी जनकपुरधाम आउने कार्यक्रम रहेको उनले बताए ।
शुक्रवारदेखि एकीकृत समाजवादी पार्टीका र लोसपाबाट छुटफुट भएका स्थानीय तहका जनप्रतिनिधिहरुले सनाखत गर्ने कार्यक्रम रहेको आयोगका प्रमुख झाले बताईन ।
यो विषयमा आफ्नो प्रतिक्रिया दिनुहोस् !