बुटवल, लुम्बिनी प्रदेशका मुख्यमन्त्री कुलप्रसाद केसीले विश्वासको मत पाएका छन् ।
प्रमुख विपक्षी दल एमालेको पक्षमा एक मत पनि आएन । मुख्यमन्त्री केसीले नेपालको संवैधानिक व्यवस्था बमोजिम विश्वासको मत छ भनि विश्वासको मतको मागेका थिए ।
केसी माओवादी केन्द्रसहित, नेपाली कांग्रेस, जनता समाजवादी, जनमोर्चा तथा स्वतन्त्र सांसद गरेर ४२ सांसदको समर्थनमा मुख्यमन्त्री बनेका हुन् । विश्वासको मत लिँदा पनि ४२ सांसदले नै उनलाई मत दिए ।
लुम्बिनी प्रदेशमा रहेका ८० सांसद रहेकोमा आजको बैठकमा उपस्थित सभामुखबाहेक ४३ जना सांसद उपस्थित थिए । विश्वासको मतको पक्षमा ४२ मत खसेको र विपक्षमा शून्य मत खसेको सभामुखले सुनाए । त्यस्तै एक जना भने तटस्थ रहेका छन् ।
रोल्पाको निर्वाचन क्षेत्र १ को ‘क’ बाट निवार्चित केसी साउन २८ गते लुम्बिनी प्रदेशमा प्रतिनिधित्व गर्ने नेपाली कांग्रेस, माओवादी केन्द्र, जनता समाजवादी पार्टी, राष्ट्रिय जनमोर्चा र सूर्य चिन्हबाट चुनाव लडेका एक सदस्यसहितको गठबन्धनको समर्थनमा मुख्यमन्त्री बनेका थिए ।
आज बसेको पहिलो बैठक एमालेका सांसदहरुले रोस्ट्रम घेरेर अवरुद्ध पारेका थिए। दोस्रो बैठकमा केही विधेयकहरु पेश भएका थिए । दोस्रो बैठक पनि विपक्षीहरुले बहिस्कार गरेका थिए । प्रदेश सभामा विश्वासको मत माग्दै मुख्यमन्त्री कुलप्रसाद केसीले कोभिड नियन्त्रण आफ्नो मुख्य प्राथमिकता रहेको बताएका थिए। उनले शिक्षा, स्वास्थ्य र कृषिलाई प्राथमिकतामा राखेको बताएका थिए।
यो विषयमा आफ्नो प्रतिक्रिया दिनुहोस् !