जनकपुरधाम, असार ११ गते । आफ्नाे पार्टी छाडेर एमालेमा गएकाे भन्दै नेकपा (माओवादी केन्द्र) ले कारबाही गरेका १४ जनप्रतिनिधिहरुको पद रिक्त भएको छ ।
नेकपा माओवादी केन्द्रबाट निर्वाचित भएर नेकपा एमालेमा प्रवेश गरेका स्थानीय तहका १४ जनप्रतिनिधिहरुको पद गुमेकाे हाे ।
गएको असार ७ गते माओवादीले कारबाही गरि निस्कासन गरेकामध्ये रौतहटका ७, कैलालीका ४ जना तथा सिरहा, ओखलढुंगा र महोत्तरीका एक/एक जना जनप्रतिनिधि रहेका छन् ।
कारबाहीमा पर्ने मेयरमा रौतहट मौलापुर नगरपालिकाकी रिना कुमारी साह र रौतहट कटरिया नपाका सियाराम कुशवाह रहेका छन् ।
त्यस्तै राैतहटकै ५ जना उपमेयर पनि कारबाहीमा परेका छन्। जिल्लाकाे देवाही गोनाही नगरपालिकाकी उपप्रमुख परनिया देवी, रौतहट मौलापुरका उपप्रमुख गौरिशंकर जयसवाल, फतुवाविजयपुर रौतहटकी उपप्रमुख कान्ती देवी र मानवनारायण रौतहटकी उपप्रमुख सिमल साह छन ।
सम्सी गाउँपालिका महोत्तरीका अध्यक्ष शेष फारुक र कैलाली भजनी नगरपालिकाका उपप्रमुख छायाँ देवकोटालाई पनि माओवादी परित्याग गरेको भन्दै कारबाही गरेको छ।
यस्तै यमुनामाई गाउँपालिकाकी उपाध्यक्ष गितादेवी साहलाई पनि माओवादी केन्द्रले कारबाही गरेको छ।
४ जना वडाअध्यक्षलाई पनि माओवादीले कारबाही गरेको छ। जसमा गौरीगंगा नगरपालिका –४, कैलालीकी वडाध्यक्ष भागिरथी विष्ट, गोदावरी नगरपालिका–१, कैलालीका वडाध्यक्ष शर्मानन्द भट्ट, बर्दगोरिया नगरपालिका –४, कैलालीका वडाध्यक्ष पुरन विसी र चम्पादेवी गाउँपालिका–७, ओखलढुंगाका वडाध्यक्ष सुरेश कुमार थापा छन ।
यस्तै लहान नगरपालिका सिरहाका नगर कार्यपालिका सदस्य सतमीलाल दास ताती पनि कारबाहीमा परेका छन् । कारबाहीमा परेका सबै जनप्रतिनिधिको पद रिक्त भएको सूचना आयोगले शुक्रवार सार्वजनिक गरी जनाएकाे छ।
यो विषयमा आफ्नो प्रतिक्रिया दिनुहोस् !