जनकपुरधाम, जेठ ५ गते । धनुषाको मिथिला नगरपालिकाका दुधपानी भन्ने एकै गाउँका एकै पटक ४६ जना कोरोना संक्रमित भएका छन ।
धनुषाको पुर्वपश्चिम राजमार्गमा पर्ने मिथिला नगरपालिका ११ दुधपानी गाउँका ४६ जना व्यक्तिमा कोरोना संक्रमण पुष्टि भएको बताइएको छ ।
नगर प्रमुख हरिनारायण महतोका अनुसार सो गाउँमा एकैपटक धेरैलाई ज्वरो भएको आफू कहाँ जानकारी आएपछि ५४ जनाको पीसीआर परिक्षण गराउंदा ४६ जनाको रिपोर्ट पोजेटिभ आएको हो ।
उनले भने संक्रमित भएका मध्ये एकजना बाहेक सबैको अवस्था सामान्य छ । गम्भीर अवस्था देखिएका बिरामीलाई उपचारका लागि सिन्धुली पठाएको छु, अन्य संक्रमित होम आइसोलेशन बसेका छन । तर तिनीहरु स्वास्थ्यकर्मीको निगरानीमा रहेका छन ।
होम आइसोलेशनमा बसेकाहरुमा कुनै थप समस्या देखिएमा उपचारका लागि नगरपालिकाले तयार पारेको कोभिड विशेष अस्पताल र आइसोलेशनमा ल्याइने छ यदि स्वास्थ्य अवस्था गम्भीर भएमा नगरपालिकाकै खर्चमा अन्यत्र उपचारका लागि लगिनेछ ।
एकै गाउँका यतिको संख्यामा कसरी संक्रमित हुन पुगेको जिज्ञासामा मेयर महतोले भने केही दिनअघि सो गाउँका दुई जना व्यक्ति काठमाडौबाट आएका थिए । त्यसैबाट संक्रमण फैलिन गएको हुन सक्ने अनुमान गरिएको छ ।
उनले भने संक्रमित व्यक्तिहरुको सम्पर्कमा आएका व्यक्तिहरुको डाटा संकलन गरिरहेका छौं, सबैको कन्ट्राक्ट ट्रेसिङ्ग गरेर पीसीआर परिक्षण गराउने तयारी भइरहेको छ । उता एकै पटक ४६ जनामा संक्रमित भएपछि पुरै गाउँ नै त्रसित भएको छ ।
यो विषयमा आफ्नो प्रतिक्रिया दिनुहोस् !