जनकपुरधाम, वैशाख ३० गते । नेकपा माओवादीले प्रदेश २ को समानुपातिकतर्फ प्रदेश सभा सदस्यमा पश्मिना कादरीलाई चयन गरेको छ ।
बिहीवार प्रदेश सभामा एक कार्यक्रमका बीच कादरीलाई सभामुख सरोजकुमार यादवले दलका नेता भरत प्रसाद सहित लगायतका पार्टीका अन्य प्रदेश सभा सदस्यहरुको उपस्थितिमा शपथ ग्रहण गराएका हुन ।
नेकपा खारिज भई एमाले र नेकपा माओवादी पुर्वरत पार्टीको अवस्थामा फर्केपछि समानुपातिकबाट निर्वाचित मो. समिर एमालेमा गइसकेपछि उनको ठाउँमा कादरीलाई प्रदेश सभा सदस्य चयन गरिएको कुरा नेकपा माओवादी संसदीय दलका नेता भरतप्रसाद साहले जानकारी दिए ।
मोहम्मद समिर पर्सा जिल्लाकै रहेको सोही क्षेत्रबाट प्रदेश सभा सदस्य दिनुपर्ने भएको हुनाले कादरीलाई चयन गरिएको उनले जनाए । पर्सा जिल्लाको महिला संगठनबाट आबद्ध कादरी वीरगंज निवासी हुन ।
प्रदेश सभा सदस्य रामचन्द्र मण्डल, ज्वालाकुमारी साह, कुन्दन कुशवाहा र मोहम्मद समिरलाई आफ्नो पार्टी छाडेर एमालेको गतिविधिमा लागेको भन्दै माओवादीले गत चैत ३० कारवाही गर्दै प्रदेश सभामा पत्रचार गरेपछि तिनीहरुको पद गुमेको थियो ।
कारवाहीमा परेका मध्ये रामचन्द्र मण्डल, ज्वालाकुमारी साह र कुन्दन कुशवाहा प्रत्यक्षबाट र मोहम्मद समिर समानुपातिकबाट निर्वाचित भएका थिए । रामचन्द्र मण्डल धनुषा १ (२), ज्वालाकुमारी साह बारा ३ (१) र कुन्दन कुशवाहा रौतहट ३ (२) निर्वाचन क्षेत्रबाट निर्वाचित भएका थिए । हाल उनीहरु पदमुक्त रहेका छन । सो क्षेत्रमा उप निर्वाचनबाट नयाँ सदस्य थपिनेछ ।
यो विषयमा आफ्नो प्रतिक्रिया दिनुहोस् !