जनकपुरधाम, वैशाख २७ गते । प्रदेश नं. २ को प्रादेशिक अस्पताल जनकपुरधाम अन्तर्गत रहेको कोभिड विशेष अस्पतालमा ३ जना कोरोना संक्रमितको उपचारको क्रममा मृत्यु भएको छ ।
अस्पतालका मेडिकल सुपरिटेन्डेन्ट डा. प्रमोद यादवका अनुसार मृत्यु हुनेमा जनकपुरधाम–२३ लादोबेलाकी ४२ वर्षीया एक महिला, जनकपुरधामकै ६५ वर्षीय एक पुरुष र वीरगंजका ४५ वर्षीय एक पुरुष गरी ३ जना रहेको छ ।
श्वासप्रश्वासमा समस्या भएपछि उपचारका लागि कोभिड अस्पतालमा तिनीहरुलाई भर्ना गरिएको थियो । मृतक मध्ये महिलालाई भर्ना भएदेखि नै भेन्टिलेटरको आवश्यकता रहेपनि समयमा भेन्टीलेटर उपलब्ध हुन नसक्दा मृत्यु हुन गएको मेसु डा. यादवले बताए । उनले भने अस्पतालमा ५ वटा भेन्टीलेटर छन तर त्यस मध्ये दुई वटा मात्रै संचालन रहेको र ती भेन्टीलेटर खाली नभएको कारण २ दिनपछि ती महिलालाई भेन्टीलेटरमा राख्दा पनि बचाउन सकिएन ।
त्यस्तै, जनकपुरधामका पुरुषलाई पनि समयमा भेन्टिलेरमा राख्न नसकिदा पछि भेन्टीलेटरमा राखिएपछि समयमा उचित उपचार पाउन नसक्दा मृत्यु हुन गएको हो । यस्तै वीरगंजका पुरुषको अक्सिजन लगाएर उपचार भइरहेको क्रममा मृत्यु भएको छ ।
सो कोभिड अस्पताल हाल ३२ जना संक्रमितको उपचार भइरहेको छ । पाइपलाईनबाट अक्सिजन दिन सक्ने गरी कोभिड अस्पतालले ४१ वटा बेड तयारी अवस्थामा राखेको छ ।
यो विषयमा आफ्नो प्रतिक्रिया दिनुहोस् !