जनकपुरधाम, वैशाख १७ गते । महोत्तरीको झा दम्पतिको अपहरण गरी हत्या गरेको आरोपमा ७ जनालाई जेल चलान गरिएको छ ।
गत फागुन १० गते राति घरमा सुतिरहेको अवस्थामा जिल्लाको पिपरा गाउँपालिका–५ निवासी ६५ वर्षीय मुसाफिर झा र ५८ वर्षीया उनका श्रीमति गीतादेवी झालाई बेपत्ता पारी हत्या गरेको आरोपमा महोत्तरी जिल्ला अदालतले सात जनालाई जेल चलान गरेका हुन ।
जिल्ला न्यायाधीश डा रमेशप्रसाद रिजालको इजलासबाट प्रतिवादीहरु कैलाश झा, हरेन्द्र ठाकुर, रामबाबु यादव, सुरेन्द्र यादव, राजेन्द्र भन्ने राजीन्द्र यादव र विकास भन्ने बबलु झालाई थुनामा राखी मुद्दाको कारबाही गर्न पुर्पक्षका कारागार पठाउन आदेश गरिएको छ ।
घटनामा संलग्न तारादेवी झालाई रु दुई लाख धरौटीमा तारेखमा राखी मुद्दाको कारबाही गर्ने आदेश गरिएको थियो । तर धरौटी बुझाउन नसक्दा तारादेवी झालाई समेत पुर्पक्षका लागि जलेश्वर कारागारमा पठाइएको हो । घटनामा संलग्न अन्य दुईजना रञ्जित मिश्र र तेजनारायण झाको हकमा पक्राउ पुर्जी म्याद जारी गर्न आदेश गरिएको छ ।
हत्या भएका झा दम्पतीका छोरा मनिष झाको जाहेरीले वादी नेपाल सरकार भएको अपहरण, शरीर बन्धक, ज्यानसम्बन्धी कसुर, आपराधिक संयन्त्र, लागुऔषध र चोरी मुद्दामा प्रतिवादीहरु सातै जनालाई पुर्पक्षका लागि जलेश्वर कारागारमा पठाइएको जिल्ला अदालतका स्रेस्तेदार मदनप्रसाद जयसवालले जनाएको छ ।
घटनामा संलग्न रहेका ९ जनामध्ये सात जनालाई पक्राउ गरी जिल्ला प्रहरी कार्यालय महोत्तरीले मुद्दा चलाएर जिल्ला अदालतमा उपस्थित गराएकामे तिनीहरु जेल चलान भएका हुन् । घटनामा संलग्न अन्य दुई जनाको पनि प्रहरीले दैनिक खोजतलास गरिरहेको र चाँडै फेला पार्ने प्रहरी उपरीक्षक दिनेशकुमार आचार्यले बताएका छन ।
फागुन १० गते सुतेकै अवस्थामा घरबाट गायब भएका झा दम्पतीको चैत १२ गते एक महिना दुई दिनपछि प्लाष्टिकको बोरामा शरीरका सबै मासु गलिसकेर कङ्काल मात्र बाँकी रहेको अवस्थामा फेला परेको थियो ।
पिपरा–२ स्थित पिपरा–धिरापुर सडकखण्डमा गत वर्षको बाढीले २० फिट गहिरो हुने गरी माटो बगाई बनाएको खाल्डो पुर्ने क्रममा स्काभेटरले नयाँ पुरिएको माटो मिलाउन खोज्दा स्काभेटरको बकेटमा कङ्काल रहेको बोरा आएपछि झा दम्पतीको अवस्था पत्ता लागेको थियो ।
यो विषयमा आफ्नो प्रतिक्रिया दिनुहोस् !