जनकपुरधाम, वैशाख १४ गते । प्रदेश २ प्रदेश सभाको सचिवालय कर्मचारीमा कोरोना संक्रमण पुष्टि भएपछि बैठक अनिश्चितकालका लागि बैठक स्थगित गरिएको छ ।
सचिवालयका ३ जना कर्मचारीमा कोरोना संक्रमण पुष्टि भएपछि आजका लागि बोलाइएको बैठक स्थगित गर्नु परेको प्रदेश सचिवालयका सचिव रञ्जित यादवले जनाएको छ ।
कर्मचारीमा वैशाख ११ गतेतरि नै संक्रमण देखिएको थियो । तर कर्मचारी व्यवस्थापन गरेर वैशाख १२ का लागि बैठक बोलाइएको थियो, तर सम्भव हुन नसकेपछि पुनः १३ गतेका लागि बोलाइयो त्यो पनि सम्भव हुन नसकेपछि आजदेखि अर्को सूचना प्रकाशन नहुञ्जेलसम्मका लागि स्थगित गरिएको उनले बताए ।
करिव ६ महिना पश्चात प्रदेशसभाको पाँचौ अधिवेशनको पहिलो बैठक चैत ३० गते बसेको थियो । दोश्रो बैठक वैशाख १० गते भएपछि तेस्रो बैठक वैशाख १२ गतेको लागि तय गरिएको थियो । तर, कर्मचारीहरु कोरोना संक्रमित भएपछि बैठक नै स्थगित गर्नु परेको छ ।
प्रदेशसभाको पाँचौ अधिवेशनको पहिलो बैठक धन्यवाद र शुभकामनामै बित्यो, दोश्रो बैठकमा प्रस्तावित राजधानी बारे छलफलमा भएको थियो ।
तेश्रो बैठकमा प्रदेश प्रस्तावित नाममा छलफल हुने भनिएको थियो । तर बैठक स्थगित हुन गएपछि अनिर्णित बन्न गएको छ ।
यो विषयमा आफ्नो प्रतिक्रिया दिनुहोस् !