जनकपुरधाम, माघ २९ गते । स्थानीय जनप्रतिनिधि विलासी हुँदै गएको आरोप लाग्दै आएको बेला धनुषाका एक जनप्रतिनिधि आफ्नो पहलमा श्रीमद् भागवत ज्ञान यज्ञ आयोजना गरेका छन ।
धनुषाको विदेह नगरपालिकाका मेयर बेचन दासले स्थानीयवासी र आफ्नो निजी लगानीमा नगरपालिकाको वडा नम्बर ६ स्थित तिनकौरिया बजारमा श्रीमद् भागवत साप्ताहिक ज्ञान यज्ञ आयोजना गराएका छन ।
मानव कल्याणको उद्देश्यले ब्रम्हज्ञान केन्द्र नेपालद्वारा फागुन २४ गतेबाट शुरु भएको महायज्ञ फागुन १ गतेसम्म चल्ने विदेह नगरपालिका वडा नम्बर ७ योगियाराका स्थानीय नविन झाले जानकारी दिएका छन । सो ज्ञान यज्ञमा दैनिक रुपमा स्वामी शिवानन्दजी र कथा व्यास भागवत भास्कर विदुषी मैत्रेयी भारतीले संयुक्तरूपमा भागवत कथा वाचन गर्दै आएका छन ।
कथा श्रवण र महायज्ञमा नगरवासी सहित अन्य पालिकावासी समेत दैनिक हजारौको संख्यामा सहभागी हुने गरेको उनले बताए । दैनिक बिहान र दिउंसो दुई पटक वाचन हुने श्रीमद् भागवत कथा श्रवण गर्न मेयर दास स्वयं उपस्थित हुनुका साथै नगरका युवादेखि वृद्धवद्धाहरुको सहभागिता रहने गरेको बताइएको छ ।
युवाहरुमा हिन्दु धर्म संंस्कृतिको विषयमा ज्ञानको अभाव रहेको समयमा यस महायज्ञले उनीहरुमा पक्कै पनि आफ्नो धर्म र संस्कृतिप्रतिको ज्ञान बढ्न र अनुशासनका साथै व्यवहारमा परिवर्तन हुने उद्देश्यले श्रीमद् भागवत ज्ञान यज्ञको आयोजना गरिएको मेयर दासले बताए ।
करीब २० लाख खर्च हुने अनुमान गरिएकोमा ज्ञानयज्ञ समितिका सदस्यहरु, दानपुण्यबाट र घटी भएका सम्पूर्ण आफू व्यक्तिगत सहयोग गर्ने जानकारी समेत मेयर दासले दिए । उनले भने यस ज्ञानयज्ञमा नगरपालिकाबाट एक रुपैयापनि हामीले खर्चेका छैनौ, केही रकम दानबाट आउंछ, केही रकम समिति सहयोगले संकलन गरेको र बाँकी सबै रकम म आफ्नो निजी गर्दै आएको छु ।
मेयर दासले भने धार्मिक कार्यप्रति रुचि मेरो पहिला देखि नै रहेको छ, यसअघि पनि मेयर नभएको बेलामा विभिन्न मठ मन्दिर निर्माण तथा सौन्दर्यकरणका साथै कथा प्रवचनहरु कयौं पटक आफ्नो निजी लगानीमा गरिसकेको छु ।
यो विषयमा आफ्नो प्रतिक्रिया दिनुहोस् !