जनकपुरधाम, माघ २७ गते । जनता समाजवादी पार्टी (जसपा) नेपालको जिल्ला समायोजनमा एकीकृत दल तात्कालिन समाजवादी पार्टी एकलौटी गर्न खोजेको आरोप लगाइएको छ ।
सोमवार प्रदेश १ को सुनसरी जिल्लामा भएको समायोजनामा सपाले एकलौटी रुपमा पार्टी कब्जा गर्न खोजेको तात्कालिन राजपा नेपालले आरोप लगाएको छ ।
सुनसरी जिल्ला जसपा समायोजना सहजीकरण कार्यदलको तर्फबाट राजपा पक्षका सन्तोष कुमार मेहता र मनिष प्रसाद रौनियारले संयुक्त रुपमा विज्ञप्ति जारी गर्दै दुवै पार्टीबीचको समायोजन निर्देशिका, विधान र समायोजन सम्बन्धी पुरक सकुर्लरको अवज्ञा गर्दै सपाले एकलौटी रुपमा समायोजन गरेको आरोप लगाएको छ ।
सहमतिको बेवास्ता गर्दै राजपा पक्षको केन्द्रिय समायोजन सहजीकरण कार्यदल र जिल्ला समितिलाई बाईपास गरी एकतर्फी रुपमा कब्जा गर्ने मनसायले तथाकथित रुपमा विवादित बनाउने गरी जिल्ला समायोजनको घोषणा गरिएको विज्ञप्तिमा भनिएको छ ।
पुर्व राजपाको जिल्ला समितिलाई बेवास्ता गरी केन्द्रिय निर्णय बिना नै सपा पक्षका केही व्यक्तिलाई समेटेर कार्यकारिणी सदस्य महेन्द्र राय यादवको उपस्थितिमा जिल्ला समायोजन गरिएको खेदजनक हो र यसले पार्टी भित्र गुटबन्दी हावी भई संगठन नै धारासायी अवस्थामा पुग्ने भन्दै केन्द्रिय पदाधिकारी र कार्यकारिणी सदस्यलाई गम्भीर हुन विज्ञप्ति मार्फत आग्रह गरिएको छ ।
साथै यस्ता मनपरी रोक्न र अनुशासनको दायरामा ल्याउनमा मांग गर्दै नाटकीय रुपमा गरिएको समायोजन राजपा पक्षलाई मान्य नहुने चेतावनी समेत दिइएको छ ।
सोमवार सम्पन्न समायोजन कार्यक्रमबाट जिल्ला समन्वय समितिको अध्यक्षमा सपा पक्षका भागिरथ खत्बे र सचिवमा प्रदीप कार्की लगायतका व्यक्तिहरुलाई चयन गरिएको थियो ।
यो विषयमा आफ्नो प्रतिक्रिया दिनुहोस् !