जनकपुरधाम, माघ २४ गते । थप दाइजो नदिइएको कारण घरबाट विस्थापित भएकी महोत्तरी बलवा नगरपालिका ६ बनौटाकी एक महिला न्यायका लागि भौंतारिदै छिन ।
करीब तीन वर्षअघि २५ लाख खर्चेर सर्लाही जिल्लाका चकरघट्टा गाउँपालिका पररिया निवासी अनिता साहको बनौटा निवासी जयनारायण साहको छोरा मनिष साहसँग बिहे भएको थियो । तर हाल थप दाइजो नदिइएको कारण उनी ससुराली पक्षद्वारा विस्थापित भएकी छिन ।
माइत पक्षको सहयोगमा बिहीवार जनकपुरधाममा एक पत्रकार सम्मेलन आयोजना गरी थप दाइजो नदिइएको कारण आफ्ना श्रीमान मनिष साह, ससुरा जयनारायण साहले महिनौदेखि कुटपिट गर्दै हाल घरबाट विस्थापित गरिदिएको अनिताले आरोप लगाईन ।
उनले भनिन मेरै बुवाले दाइजोमा दिएको नगद १२ लाख रुपैयाले पडौलथानमा कपडा पसल संचालन गर्दै आएका छन । बिहेको केही दिनपछि थप दाइजो माइतबाट मांगेर ल्याउ भनी शारिरीक र मानसिक यातना दिर्दै कुटपिट गर्दै आएको छ । शुरुमा थप दाइजो मांगेर ल्याउ भनी यातना दिदै आएको थियो, अहिले आएर तिमीभन्दा सुन्दर केटीसँग दोश्रो विवाह गरिसकेको छु तिमी यहाँबाट जाउँ भनिरहेको पीडा उनले सुनाईन ।
माइती पक्षको सहयोगमा अनिताले न्यायका लागि गएको असार महिनामा सम्बन्धित ईलाका प्रहरी कार्यालय बनौटा र जिल्ला प्रहरी कार्यालयमा उजुरी दिएपछि गएको साउन ७ गतेका दिन जनता समाजवादी पार्टीका प्रदेश सांसदद्वय सुरिता साह र मनिषका मामा भनिएका जानकी साहको उपस्थितिमा अबदेखि यातना नदिने भनी सहमति भयो । तर त्यो सहमति कार्यान्वयन हुन सकेन ।
त्यसयता आजिज भई पुनः जिल्ला प्रहरी कार्यालयको महिला सेल र बनौटा प्रहरी कार्यालयमा उजुरी दिए तर कुनै सुनुवाई हुन सकेको छैन । के भयो भनेर सोध्न जाँदा प्रहरीले हप्काएर पठाउने गरेको छ ।
पत्रकार सम्मेलनमा अनिताका बुवा विष्णुदेव साहले भने बिहेमै साढे १२ लाख नगद, ५ लाखको गरगहना र डेढ लाखको कपडा सहित २५ लाख रुपैया खर्चिसकेको छु अब थप दाइजो कहाँबाट ल्याएर दिऊ ।
उनले भने आफ्नो छोरी पटक पटक घरमा थुनेर कुटपिट र जलाएर मार्ने भइरहेको प्रयासबाट आजिज भई दिएको उजुरीको आधारमा छोरीलाई नागरिकता, विवाह दर्ता र बच्चाको जन्मदर्ता बनाई दिने सहमति भएको थियो । तर नागरिकता र विवाहदर्ता बनाउन भन्दा कुटपिट गर्दै आएका छन ।
एसपी र सांसदद्वयको उपस्थितिमा भएको सहमति कार्यान्वयन र छोरीको जीवन रक्षाका लागि पटक पटक बनौटा प्रहरी कार्यालयमा आग्रह गरेपछि बनौटा ईलाका प्रहरी कार्यालयका रविन्द्र सिंहले आफ्नो ग्यारेन्टीमा दुई साताअघि जनकपुर बस्न पठाई दियो ।
जनकपुरको भमरपुरा चौकमा डेरालाई राखेर दुई दिनमै अनितालाई छाडेर मनिष सम्पूर्ण गरगहना, रुपैया पैसा र मोबाइल समेत लिएर फरार भइसक्यो । श्रीमानको बाटो हेर्दा हेर्दै अनिताले छिमेकीको सहयोगमा पुनः बुवा जयनारायणलाई घटना बारे जानकारी गराउंदै सहयोगका लागि आग्रह गरिने ।
छोरी अनिताको कुरा आफू जनकपुर आई उनलाई लिएर पुनः बनौटा र जिल्ला प्रहरी कार्यालयमा सहयोगका लागि पुग्दा अब के गरौ, जहाँ जानुछ जाउँ म केही गर्न सक्दैन भनी उल्टै हप्काउने गरेको पीडा उनले बताए । पत्रकार सम्मेलन पश्चात अधिवक्ता रेखा दत्तको सहयोगमा सुरक्षाका लागि ओरेक नेपालको सेफ हाउसमा अनितालाई राखिएको छ ।
उता घटना बारे ईलाका प्रहरी कार्यालय बनौटाका प्रमुख सई रविन्द्र सिंहले भने हामीले पटक पटक सहमति गराउने प्रयास गरयौं तर हुन सकेन । अन्त्यमा एसपी साबकै उपस्थितिमा लिखित सहमति पनि गरायौं । तर सो सहमतिपनि कार्यान्वयन भएन । अन्ततः यातनाबाट बचाउन तिनीहरुलाई जनकपुर पठयौ तर केटा त दुई दिनपछि नै अनितालाई छाडेर फरार भयो र अहिलेसम्म फरार नै छ ।
उनले भने प्रहरीले मनिषको खोजी गरिरहेको छ । उनी भेटाएपछि दुवै पक्षलाई बसाएर समाधान गर्ने प्रयास गर्छौ यदि त्यसो नभएको खण्डमा हामी कानूनी उपचारतर्फ जानेछौं ।
लोकपुकारको जिज्ञासामा उनले भने घटना पश्चात केटीका बुवा आफू कहाँ उजुरी दिएका छन तर के गरौं केटा नै फरार छ, त्यसको आमाबुवालाई समात्न मिल्दैन । केटा भेटाएपछि मात्रै अब केही हुन सक्ने सई सिंहले बताए ।
सिंहले एसपी साबको उपस्थितिमा सहमति गराएको बताएपनि महोत्तरीका प्रहरी प्रवक्ता डिएसपी प्रकाश विष्टले घटना बारे केही जानकारी नै नभएको बताउंछन । उनले भने घटना बारे आफूलाई केही जानकारी छैन ईप्रका बनौटा संग बुझेर मात्रै भन्छु ।
यो विषयमा आफ्नो प्रतिक्रिया दिनुहोस् !