जनकपुरधाम, माघ २३ गते । राजनीतिक नियुक्तिले गर्दा जनता समाजवादी पार्टी (जसपा) नेपाल भित्र विवाद उत्पन्न भएको छ ।
पछिल्लो पटक मधेश स्वास्थ्य प्रतिष्ठानमा पदाधिकारी नियुक्तिले उठेको विवाद अहिले संचार क्षेत्रका निकायमा भएको पदाधिकारी नियुक्ति जसपा भित्र प्रदेश २ को सत्तारुढ तात्कालिन समाजवादी पार्टी र राष्ट्रिय जनता पार्टी (राजपा) नेपालबीच विवाद तिव्र बनेको छ ।
पछिल्लो पटक भागबण्डाले महिनौदेखि स्वास्थ्य प्रतिष्ठानमा अड्किएका पदाधिकारी नियुक्तिमा राजपाले आफ्नो मन्त्रालय अन्तर्गत रहेको अधिपत्य जमाएपछि निकै कसरतपछि सपाले पनि संचार क्षेत्रको निकायमा एकलौटी कब्जा गरेका छन । शुक्रवार बिहान बसेको मन्त्रिपरिषदको बैठकबाट आमसञ्चार प्राधिकरण, मिडिया काउन्सिल र लोक संचार प्रबर्द्धन बोर्डमा सपाले आफ्ना निकट र संगठनमा नियुक्त गरी सपाले कब्जा गरेका छन ।
सञ्चार प्राधिकरणको अध्यक्षमा श्यामसुन्दर यादव, मिडिया काउन्सिलको अध्यक्षमा शिवहरि भट्टराई र चलचित्र विकास बोर्डको अध्यक्षमा धर्मेन्द्र मोरबैतालाई नियुक्त गरेकोमा अनौपचारिक रुपमा राजपा सम्बद्ध नेताहरु विरोध जनाउन थालेका छन ।
लोकपुकार कुरा गर्दै राजपा सम्बद्ध एक प्रदेश सांसदले भने राजनीतिक नियुक्तिमा सपाले एकलौटी गर्नु सरासर गलत हो । तर जसपा भित्र विवाद भयो भनेर हुने हल्लाको डरले खुलेर बोल्न नसक्ने अवस्था छ । पार्टीभित्र कुनै छलफल नै नगरी सपाले मनमानी गरेको छ जसको विरोध हामी केन्द्रिय कार्यसमितिको बैठकमा गर्र्ने छौं ।
हाल जसपाका कार्यकारिणी सदस्य रहेका एक राजपा नेताले पनि स्वास्थ्य प्रतिष्ठान वा संचार क्षेत्रको निकायमा कुनैपनि दलले एकलौटी गर्नु गलत हो । अहिले भइरहेका नियुक्ति बारे कार्यसमितिमा कुनै छलफल नै पदीय दम्भको आधारमा नियुक्ति गर्दै आएको आरोप लगाए ।
नियुक्त भएका यादव सपाको भातृ संगठन प्रेस नेपालका प्रदेश २ अध्यक्ष हुन भने भट्टराई सपाका महिला उपाध्यक्ष रेणु यादव निकटका व्यक्ति छन । त्यस्तै मरबैता मुख्यमन्त्री लालबाबु राउत निकट व्यक्ति हुन ।
चिनजान पहिलादेखि रहेपनि रेणु यादवसँग भट्टराईको नजिकता दोश्रो जनआन्दोलनको बेलादेखि रहेको बताइएको छ । आन्दोलन दबाव समूहमा सदस्य भएकी यादवकीलाई भट्टराईले निकै सघाएको कुरा सप्तरीका एक राप्रपा नेताले बताएका छन । राप्रपादेखि जसपासम्मको यात्रामा सघाएको प्रतिफल जसको प्रतिफल अहिले भट्टराई मिडिया काउन्सीलबाट पाएका हुन ।
मरबैता ती व्यक्ति हुन जसले यसअघि बेटी पढाउ बेटी बचाउ कार्यक्रमको राजदुतमा रेखा थापालाई नियुक्त गराउन मुख्यमन्त्री राउतसंग सिफारिस गरेको कारण विवादमा तानिएको थियो ।
हुनत तात्कालिन फोरम गणतान्त्रिकका अध्यक्ष राजकिशोर यादव संचारमन्त्री भएको बेला मरबैता चलचित्र बोर्ड नेपालका अध्यक्ष बनिसकेका हुन । कनिष्टलाई अध्यक्ष बनायो भनी त्यस बेला पनि मरबैलाको निकै विरोध भएको थियो ।
यसअघि प्रदेश सरकार अन्तर्गत कुनैपनि निकायमा राजनीतिक नियुक्तीमा सहमतिय आधारमा सतारूढ तात्कालिन राजपा र सपा दुवैले भागबण्डा गर्ने गर्थे । तर मधेश स्वास्थ्य विज्ञान प्रतिष्ठानमा राजपाले सबै भाग मारेपछि सपाले पनि मिडिया क्षेत्रका तिनवटै पद आफै खोसेका छन ।
संचार क्षेत्रको निकायमा अहिले नियुक्त भएका पदाधिकारीहरुलाई नै अनौपचारिक रुपमा सपाले महिनौअघि नियुक्त गरिसकेका थिए । तर राजपाको अवरोधले केही दिन रोकियो । यसैबीचमा सो पदका लागि एउटै सपा पार्टीबाट मुख्यमन्त्री लालबाबु राउत र आन्तरिक मामिला तथा कानून मन्त्री ज्ञानेन्द्र यादवबीच जुहारी नै भयो । कुरा नमिलेपछि अन्ततः मन्त्री यादवले खुल्ला प्रतिष्पर्धाबाट नियुक्त गर्ने भनी विज्ञापन नै प्रकाशन गरे । विज्ञापनमा केही आवेदन परेपनि नियुक्ति चाहि पार्टीगत आधारमा गरिएको आरोप लाग्न थालेको छ ।
यो विषयमा आफ्नो प्रतिक्रिया दिनुहोस् !