जनकपुरधाम, माघ १४ गते । यातायात व्यवस्था कार्यालय जनकपुरधामले अख्तियार दुरुपयोग अनुसन्धान आयोगको छापामारीपछि चालक अनुमति प्रमाणपत्र (लाइसेंस) को लिखित तथा प्रयोगात्मक परीक्षा स्थगित गरेको छ ।
मंगलवार बेलुका अख्तियार दुरुपयोग अनुसन्धान आयोगको ७ घण्टे छापामारीपछि यातायात व्यवस्था कार्यालयबाट २ लाख ७३ हजार ८ सय रुपैया सहित एक कार्यालय सहयोगी र विचौलिया सहित दुई जनालाई नियन्त्रणमा लिएको थियो ।
अख्तियारको छापामारीपछि बुधवार माघ १४ गतेदेखि १६ गतेसम्म चालक अनुमति पत्रको हुने भनिएको सम्पूर्ण लिखित तथा प्रयोगात्मक परीक्षा कार्यव्यस्तताको कारण देखाई यातायात कार्यालयले अनिश्चितकालका लागि स्थगित गरेको छ ।
कार्यालयका निमित प्रमुख विरेन्द्र साहले एक सूचना प्रकाशित गरी कार्यव्यवस्तताको कारणले अर्को सूचना प्रकाशन नहुञ्जेलसम्मका लागि माघ १४ देखि १६ गतेसम्म हुने सम्पूर्ण लिखित तथा प्रयोगात्मक परिक्षा स्थगित गरिएको जनाएको छ ।
सवारी चालक परिचय–पत्र वापत उठाएको घुसको ठूलो रकम कार्यालयभित्रै रहेको गोप्य सूचनाको आधारमा अख्तियारको बर्दिबास कार्यालयबाट खटेको टोलीले मंगलवार बेलुका ४ बजेदेखि राति ११ बजेसम्म छापामारी गरेको थियो ।
सो अवधिमा अख्तियारको टोली कार्यालय प्रमुख सहित दुईजना करारका कर्मचारी, एक कार्यालय सहयोगी र दुई विचौलियालाई कार्यालयभित्रै नियन्त्रणमा राखि अनुसन्धान थालेको थियो ।
अनुसन्धानको क्रममा घुस प्रकरणमा संलग्नता देखिएका कार्यालय सहयोगी भोगिन्द्र कापर र विचौलिया राजकिशोर भगतलाई रकम सहित नियन्त्रणमा लिएको र एकजना कम्प्यूटर अपरेटर अनिल गिरी फरार रहेकोले उनको खोजी कार्य जारी रहेको ज्ञवालीले बताए ।
यो विषयमा आफ्नो प्रतिक्रिया दिनुहोस् !