जनकपुरधाम, माघ १३ गते । आगामी वैशाख १७ गतेदेखि हुने प्रतिनिधि सभाको निर्वाचन प्रक्रिया विधिवत रुपमा अघि बढाइएको छ ।
निर्वाचनको तयारी स्वरुप पहिलो चरणमा माघ १५ गतेदेखि एक हप्ते मतदाता अद्यावधिक (दाबी विरोध समेत) को कार्यक्रम निर्वाचन आयोगद्वारा शुरु हुने भएको छ ।
मंगलवार राजनीतिक दल तथा सरोकारवालाबीच एक अन्तरक्रिया कार्यक्रम आयोजना गरी माघ १५ गतेदेखि २१ गतेसम्म स्थानीय तह मार्फत मतदाता अद्यावधिक कार्यक्रम संचालन गरिने निर्वाचन आयोगको कार्यालय धनुषाले जानकारी दिएका छन ।
स्थानीय स्तरबाट संचालन हुने सो कार्यक्रमका लागि स्थानीय तहबाट सहायक मतदाता अधिकारीको रुपमा खटाई मतदाता अद्यावधिक कार्यक्रम संचालन गरिने जानकारी निर्वाचन आयोग धनुषाका प्रमुख पुष्पा झाले जानकारी दिएकी छिन ।
उनले भनिन मतदाता नामावलीमा नाम, ठेगाना त्रुटि भएको, दोहरो नाम भएको, मृत्यु भइसकेका वा बसाई सराई भएको सच्याउने कार्य अद्यावधिक कार्यक्रम अन्तर्गत हुनेछ ।
स्थानीय तहबाट सहायक मतदाता अधिकारीबाट सिफारिस भएर आएकाहरुको त्रुटि आयोगद्वारा सच्याई अन्तिम नामावली माघ २६ गते र दोहरो नामावली सच्याइएको सहित फागुन २ गतेसम्म प्रकाशन हुने समेत उनले जानकारी दिइन ।
कार्यक्रम अनुसार माघ १५ गते मतदाता नामावली प्रकाशन, १६ गते १८ गतेसम्म त्रुटि सच्याउने, दोहरो नामावली, मृत्यु भएका वा नागरिकता त्याग गरेका वा झुट्ठा विवरण पेश गरी मतदाता बनेको लगायतका प्रमाण सहित निवेदन लिइनेछ । सो निवेदनमाथि छानबीन गरी १९ गते आरोपितलाई सफाईको मौका दिइने, २० गते सो विवरण जिल्ला प्रमुख मतदाता अधिकारी समक्ष स्थानीय तहबाट विवरण पेश गरिने र ती सबै निवेदन विरुद्ध जाँचबुझ गरी माघ २६ गते अन्तिम नामावली प्रकाशन गरिने भएको छ ।
धनुषाामा ६ हजार बढी मतदाता थपियो
आगामी वैशाख महिनामा हुने निर्वाचनका लागि पछिल्लो निर्वाचनभन्दा धनुषामा ६ हजार ४ सय ७२ जना मतदाता थपिएको छ ।
पछिल्लो पटक २०७४ मा जिल्लामा ४ लाख ४ हजार ६ सय ७४ मतदाता रहेकोमा अब मतदाता संख्या ४ लाख ११ हजार १ सय ४६ पुगेको छ । कार्यक्रममा नेपाली कांग्रेसका प्रतिनिधि विशेश्वर यादवले निर्वाचन अघि स्थानीय नामावली घर दैलो कार्यक्रम गरी संकलन नगरेको भन्दै विरोध जनाएको थियो ।
कडा सुरक्षाकाबीच कार्यक्रम
मंगलवार जिल्ला निर्वाचन आयोगद्वारा मतदाता नामावली अद्यावधिक (दाबी विरोध समेत) कार्यक्रमको क्रियाकलाप संचालन हुने सम्बन्धमा जानकारी दिने उद्देश्यले आयोजित सो अन्तरक्रिया कार्यक्रममा दलहरुले विरोधले गर्दा कडा सुरक्षाकाबीच सम्पन्न गरिएको छ ।
दलहरु विरोधमा भएको कारणले हो हल्ला र कार्यक्रम भाँडिने सक्ने दृष्टिगत गर्दै सहभागी भन्दा तेब्बर संख्यामा कार्यक्रम स्थल अधिकृत संगम बाहिर सुरक्षाकर्मी परिचालन गरिएको थियो ।
सो कार्यक्रममा पछिल्लो निर्वाचनमा सहभागिता जनाएका १२ वटा दल मध्ये नेपाली कांग्रेस, राप्रपा र जनमत पार्टी बाहेक कुनैपनि दलले सहभागिता जनाएको थिएन । आगामी वैशाख हुने निर्वाचनको विरोधमा रहेका जनता समाजवादी पार्टी र नेपाल कम्युनिष्ट पार्टी प्रचण्ड नेपाल समूहले निर्वाचन आयोगद्वारा आयोजित कार्यक्रमको कडा रुपमा विरोध गरेका छन ।
यो विषयमा आफ्नो प्रतिक्रिया दिनुहोस् !