जनकपुरधाम, पुस ९ गते । प्रदेश २ को अस्थायी राजधानी जनकपुरधामको मिथिला डिपार्टमेन्टल स्टोरमा भएको आगलागीबाट करोडौको क्षति भएको छ ।
जनकपुरधाम २ शिव चौकमा संचालित मिथिला डिपार्टमेन्टल स्टोर बिहीवार बिहान करीब १० बजेदेखि लागेको आगलागी करीब १ बजेतिर नियन्त्रणमा आएको छ ।
नेपाल प्रहरी, नेपाली सेना र सशस्त्र प्रहरीको १ सय ९५ जनाको टोलीले ३ घण्टाको सकस पश्चात आगो नियन्त्रणमा लिएको थियो ।
जनकपुरधाम उपमहानगरपालिकाको बारुण बिग्रेको कारण एक घण्टा पश्चात धनुषाको क्षिरेश्वरनाथ नगरपालिका, धनुषाधाम नगपालिका, विमानस्थल, महोत्तरीको जलेश्वर नगरपालिका, बर्दिबास नगरपालिकाबाट वारुण यन्त्र मंगाई आगो नियन्त्रणमा लिइएको प्रहरीले जनाएको छ ।
प्रहरीका अनुसार सो आगलागीमा अढाई करोड रुपैया बराबरको चिनी, तेल, साबुन, लताकपडा, परफ्युम र कस्टेमिक लगायतका घरायसी सामाग्रीहरु ठूलो मात्रामा जलेर नष्ट भएको प्रहरीले जनाएको छ ।
सामाग्री बाहेक फर्निचर र भवनमा समेत करोडौ रुपैया बराबरको क्षति भएको अनुमान गरिएको छ । स्थानीय प्रत्यक्षदर्शीका अनुुसार सामाग्री, भवन र फर्निचर गरी करीब ५ करोड रुपैया बराबरको क्षति भएको हो ।
आगोको खबर पाउने बितिकै मेयर फरार
यसैबीच स्थानीय व्यवसायी र युवाहरुले जनकपुरधाम उपमहानगरपालिकाको लापरवाहीको कारण सामान्य आगलागी भीषण आगलागीमा परिणत भएको भनी विरोध जनाएको छ ।
उपमहानगरपालिका जस्ता निकायमा २/२ वटा वारुण यन्त्र भएपनि एउटा पनि संचालनमा नरहेको कारण बाहिरबाट वारुण यन्त्र मंगाउन समय लागेको कारण भीषण आगलागी हुन गएको स्थानीय व्यवसायीहरुले आरोप लगाएका छन ।
उनीहरुले सवारी मरम्मत सम्भारको नाममा उपमहानगरपालिकाले करोडौ रुपैया खर्च गर्छन, कर्मचारीका लागि लाखौको बस किनेर थन्काएको छ र आफू डेढ करोडभन्दा बढीको गाडीमा चढन तर महिनौदेखि बिग्रेका वारुण यन्त्र बनाउन नसक्नु उपमहाननगर जनप्रतिनिधिको ठूलो लापरवाही रहेको बताए ।
उपमहानगरपालिका मेयर लालकिशोर साहको विरोध गर्दै तिनीहरुले उपमहानगरपालिका घेराउ गर्दै मेयर विरुद्ध नाराबाजी समेत गरेका छन ।
आगो लागेको खबर पाउन बितिकै मेयर साह समस्याको समाधान गर्नुको सट्टा उपमहानगरपालिका कार्यालय छाडेर भागेकोमा स्थानीय व्यवसायी झन आक्रोशित भएका छन । आक्रोशित समूह उपमहानगरपालिका पुग्नु अगावै मेयर साह सुरक्षाकर्मीको सहयोगमा कार्यालय छाडेर फरार भएको नाम बताउने शर्तमा एक कर्मचारीले बताए ।
आक्रोशित समूहले उपमहानगरपालिकामा विरोध गर्न खोज्दा प्रहरीले सार्वजनिक स्थल भएको कारण विरोध नगर्न भनी सम्झाई बुझाई आधा घण्टा पश्चात फर्काएका थिए । विरोध अवधिभरि उपमहानगरपालिकामा सुरक्षार्थ दर्जनौ प्रहरी परिचालन गरिएको थियो ।
यो विषयमा आफ्नो प्रतिक्रिया दिनुहोस् !