जनकपुरधाम, पुस ८ गते । सरोकारवालाहरुले शिक्षामा राजनीतिकरण होइन राजनीतिक मुद्दा बनाउनुपर्नेमा जोड दिएका छन ।
बुधवार शिक्षाका लागि राष्ट्रिय अभियान नेपालद्वारा आयोजित के शिक्षा राजनीतिक मुद्दा हो विषयक अन्तरक्रिया कार्यक्रममा बोल्दै सरोकारवालाहरुले शिक्षामा राजनीतिकरण भइरहेको कारण नै गुणस्तरीयता खस्किदै गएको दाबी गरेका छन ।
उनीहरुले वर्तमान परिवेशमा कोभिड १९ को कारण शिक्षामा परेको असरमा समेत राजनीतिकरण गरिन हुन थालेको भन्दै शिक्षामा हरेक वर्गको सहज पहुँच र गुणस्तरीय शिक्षाका लागि राजनीतिक मुद्दा बनाउनुपर्नेमा जोड दिएका थिए ।
अन्तरक्रियामा सहभागी विभिन्न गैर सरकारी संघ संस्थाका प्रतिनिधि, सामुदायिक विद्यालयका प्रतिनिधि, राजनीतिकर्मी र पत्रकारहरुले साक्षरता दर बढाउन र शैक्षिक विकासका लागि हरेक तहबाट इमान्दारीपुर्वक आ आफ्ना दायित्व पुरा गर्नुपर्ने आवश्यकता रहेको बताएका थिए ।
शिक्षामा शिक्षक सरुवा बढुवा, विभिन्न राहत, पिसीए र बालविकासको नाममा जारी विकृति तथा भ्रष्टाचारले समेत गुणस्तरीय शिक्षामा असर पारेकोले सम्बन्धित व्यक्ति इमान्दार हुनुपर्नेमा जोड दिएका थिए ।
कार्यक्रममा सहभागी शिक्षकहरुले विद्यार्थी संख्या अनुसार पुर्वाधार र शिक्षक नरहेको कारण पठन पाठनमा निकै समस्या भइरहेको औल्याउंदै स्थानीय तहमा शैक्षिक अधिकार गएपछि तलब भत्तामा समेत समस्या उत्पन्न भइरहेको पीडा पोखेका थिए ।
उनीहरुले केन्द्र सरकार र स्थानीय तहले पीडा दिइ नै रहेको छ, तर प्रदेश सरकार समेत आफ्नो समस्याप्रति उदासीन रहेको बताउंदै शैक्षिक सुधारका लागि प्रदेश सरकारले पनि शिक्षामा लगानी गर्नुपर्ने भने ।
कार्यक्रमका प्रमुख अतिथि प्रदेश सभा सदस्य रामसरोज यादवले शिक्षा बारे नेपाल सरकारको निती नै गलत रहेको र प्रदेश सरकारलाई शैक्षिक अधिकार नदिइएको कारण वर्तमान समस्या उत्पन्न भएको बताएका थिए ।
उनले भने माध्यमिक शिक्षासम्म पाठ्यपुस्तकदेखि भौतिक पुर्वाधार र शिक्षकहरुको तलबसम्म स्थानीय तहलाई सम्पूर्ण अधिकार दिइएको छ, प्रदेश सरकारलाई कुनै अधिकार नै नदिइएको कारण काम गर्न समस्या भएको हो । अधिकार नभएपनि प्रदेश सरकारले गर्न सक्ने विद्यालयको भौतिक पुर्वाधारमा लगानी गर्न नसकेको आरोप लगाउंदै सम्पूर्ण बजेट मन्दिर, मस्जिद, सडक र पोखरी सौन्दर्यकरणमै राख्ने कार्य गलत रहेको बताए ।
एनसीई धनुषाका अध्यक्ष कमलेश मण्डलको अध्यक्षतामा सम्पन्न सो कार्यक्रममा शिक्षाको वर्तमान अवस्था बारे पत्रकार श्यामसुन्दर शशीले कार्यपत्र प्रस्तुत गरेको थियो ।
यो विषयमा आफ्नो प्रतिक्रिया दिनुहोस् !