जनकपुरधाम, मंसिर ४ गते । प्रत्येक वर्ष लाखौको सहभागितामा हर्षोल्लासका साथ मनाइने विवाह पञ्चमी महोत्सव पनि कोरोनाको प्रभावित भएको छ ।
कोरोनाको त्रासले सीमानाका बन्द भएको कारण विवाह पञ्चमीमा सहभागी हुन भारतको अयोध्याबाट जन्ती आएको छैन भने श्रद्धालु भक्तजन तथा साधु सन्त समेत आउन सकेको छैन ।
अन्य वर्षको तुलनामा २० प्रतिशत मात्र महोत्सवमा सहभागिता देखिएको छ भने वैवाहिक सम्पूर्ण विधि औपचारिकतामा मात्र समिति गरिएको छ । भगवान श्रीरामको अभिभावकको भूमिका अयोध्याबाट आएका साधु सन्तहरुले गर्दै आएकोमा कोरोनाले उनीहरुको अनुपस्थितिमा स्थानीय राम मन्दिरका महन्थ सहितका साधु सन्तले निर्वाह गरेका छन ।
वैवाहिक कार्यक्रम अन्तर्गत मर्यादा पुरुषोत्तम भगवान श्रीराम र माता जानकीको विवाहका लागि जनकपुरधाममा प्रत्येक वर्ष झै यसवर्ष पनि स्वयंवर सम्पन्न भएको छ भने राति विवाह सम्पन्न हुनेछ ।
त्रेतायुगमा भगवान श्रीराम जानकी बीच विवाहको स्मरणमा प्रत्येक वर्ष मंसिर शुक्ल पञ्चमीका दिन जनकपुरधाममा विवाह महोत्सव मनाइदै आएको छ । वैवाहिक कार्यक्रम अन्तर्गत त्रेतायुगमा गरिएका सीता स्वयंवर झै रंगभूमि मैदान प्रत्येक वर्ष झै यसवर्ष पनि स्वयंवर कार्यक्रम आयोजना गरिएको छ ।
भगवान श्रीराम र माता जानकीको डोला बाजागाजा सहित विशेष सुरक्षाका साथ नगर परिक्रमा गराउंदै रंगभूमि मैदानमा पुगेर स्वयंवर विधि कार्यक्रम सम्पन्न गरिएको छ । सो स्वयंवर कार्यक्रम अन्तर्गत रंगभूमि मैदानमा रामजानकी दुवैको डोलालाई एक अर्काबीच मिलान र दुवै पक्षका अभिभावकबीच सम्धी मिलान गरिएको छ ।
सम्धी मिलानमा अयोध्याबाट जन्ती आउन नसक्दा भगवान श्रीरामको अभिभावकको भूमिका राम मन्दिरका महन्थ रामगिरी बाबा र माता सीताको अभिभावकको भूमिका प्रत्येक वर्ष झै यसवर्ष पनि जानकी मन्दिरका महन्थ रामतपेश्वर दास वैष्णवले गरेका छन ।
स्वयंवर कार्यक्रम पश्चात आज राति नै मिथिला संस्कृतिको विधि अनुसार वैवाहिक कार्यक्रम सम्पन्न गरिनेछ । विवाहका लागि जानकी मन्दिरको प्रांगणमा आकर्षक मडवा सहितका मण्डप बनाइएको छ ।
वैवाहिक कार्यक्रममा राममन्दिरका महन्थ राम गिरीले रामका बुबा अर्थात् राजा दशरथको भूमिका तथा जानकी मन्दिरका महन्थ रामतपेश्वर दास वैष्णव सिताको बुवा अर्थात् राजा जनकको भूमिका निर्वाह गर्ने छन् । वैवाहिक कार्यक्रमका लागि जानकी मन्दिरलाई दुल्ही झैं श्रृङगारिएको छ ।
जनकपुरधाममा सप्ताहव्यापी रुपमा विवाह पञ्चमी महोत्सव मनाइदै आएकोमा विवाह सम्पन्न पश्चात भोली शनिवार रामकलेवा सहित जन्तीको विदाई गरी विवाह पञ्चमी सम्पन्न हुनेछ । यसअघि नगर दर्शन, फुलबारी लिला, धनुष यज्ञ, तिलकोत्सव र मटकोर लगायतका विधि सम्पन्न भइसकेको छ ।
अन्य वर्ष विवाह पञ्चमी महोत्सव शुरु हुन एक साता अगावै नेपाल तथा भारतका श्रद्धालु भक्तजन तथा साधु सन्तहरु आउने गथ्र्यो । विवाह पञ्चमीका लाखाको संख्यामा भीड हुने गथ्र्यो । तर यसवर्ष खासै चहल पहल देखिएको छैन ।
यो विषयमा आफ्नो प्रतिक्रिया दिनुहोस् !