जनकपुरधाम, पुस ३ गते । वैदेशिक रोजगारमा रहेका परिवारको आयआर्जनका शहीदनगर नगरपालिकाले सीपमूलक तालिमको व्यवस्था गर्ने भएको छ ।
शुक्रवार यदुकोहामा आयोजित २१ औँ अन्तर्राष्ट्रिय आप्रवासी कामदार दिवसको अवसरमा आयोजित कार्यक्रममा शहीदनगर नगरपालिकाका प्रमुख उदय बरबरियाले वैदेशिक रोजगारमा जाने युवाहरुका लागि सीपमूलक तालिमको व्यवस्था पालिकामै गर्ने घोषणा गरेका हुन ।
धनुषाको शहीदनगर नगरपालिकामा आयोजित कार्यक्रममा नगर प्रमुख बरबरियाले वैदेशिक रोजगारमा जाने युवाहरुका लागि सीपमूलक तामिलको व्यवस्था गर्ने घोषणा गरेका हुन् । उनले उनीहरुलाई सीपमूलक तालिमको व्यवस्था गर्नका लागि ५ लाख रकम छुट्याउने समेत जानकारी दिए ।
नगर प्रमुख बरबरियाले पालिकामै सीपमूलक तालिमका लागि अलग्गै कक्षको व्यवस्था समेत गरिने बताए । यस अघि कोरोना संक्रमण चरममा रहेको बेला भारतमा काम गर्दै आएका वीरेन्द्र गुरमैताको धनुषाको नेपाल भारत सीम जटहीमा भोकका कारण मृत्यु भएको स्मरण गर्दै उनले गुरमैताको परिवारलाई ५ लाख रुपैयाको आर्थिक सहयोग गरेको समेत बताए ।
यता आप्रवासी हकहित संरक्षण केन्द्र र मित्र धनुषाको आयोजना भएको सो कार्यक्रममा बोल्ने अधिकांश वक्ताहरुले तीनै तहका सरकारलाई वैदेशिक रोजगारमा जानेहरुका लागि सीपमूलक तालिमको व्यवस्था गर्न आग्रह गरेका थिए ।
नेकपाका केन्द्रिय सदस्य श्रवण बरबरियाको प्रमुख आतिथ्यमा भएको सो कार्यक्रमका संयोजक विवेक यादवले मुलुकको अर्थतन्त्र नै रेमिटैन्सले धानीरहेको बेला आप्रवासी कामदारहरुको विषयमा कुनै पनि सरकार जिम्मेबार नहुनु दुःखद रहेको बताए । उनले शहीदनगरका नगर प्रमुख उदय बरबरियालाई धन्यवाद ज्ञापन गर्दै धनुषाका अन्य पालिकाहरुलाई समेत आप्रवासी कामदारहरुको सीपमूलक तालिमका लागि बजेट छुट्याउन आग्रह गरे ।
नेपालमा धनुषा जिल्लाबाटै सबै भन्दा बढी युवाहरु वैदेशिक रोजगारमा रहेपनि सबै भन्दा बढी रेमिटैन्स झापा जिल्लामा आई रहेको तथ्यांक छ । धनुषाका बढी युवा वैदेशिक रोजगारमा रहेपनि रेमीटैन्स किन कम आईरहेको छ भन्ने विषयमा सोच्नै पर्ने बेला आएको सहभागी वक्ताहरुले बताएका थिए ।
यो विषयमा आफ्नो प्रतिक्रिया दिनुहोस् !