जनकपुरधाम, मंसिर १७ गते । कानून विपरित नेपाल स्काउटको प्रदेश तदर्थ समिति गठन गरिएको भन्दै नेपाल स्काउट प्रगतिशील केन्द्रिय संघर्ष समितिले आपति जनाउंदै प्रदेश २ सरकारलाई ज्ञापन पत्र बुझाएको छ ।
नेपाल स्काउटका केन्द्रिय सदस्य भरत साहको नेतृत्वमा गएको स्काउटकर्मीको एक टोलीले मुख्यमन्त्री लालबाबु राउतलाई ज्ञापन पत्र बुझाएका हुन । ज्ञापन पत्र बुझाउने टोलीमा धनुषा स्काउटका गम्भीर झा, मनोज दनुवार र विरेन्द्र कर्ण लगायतका व्यक्तिहरुको उपस्थिति रहेको थियो ।
नयाँ ऐन चारी भएको ६ महिनाभित्र निर्वाचन गर्नुपर्नेमा २१ महिना बितिसक्दा त्यो समितिको औचित्य समाप्त भईसकेको भन्दै अवैधानिक सो समितिले विश्व स्काउटको आधारभूत सिद्धान्त तथा संशोधन सहित नेपाल स्काउट ऐन २०५० विपरित प्रदेश तदर्थ समिति गठन गरिएको भनी आपति जनाएको छ ।
सो ज्ञापन पत्र मार्फत ऐनको धज्जी उडाउँदै सच्चा स्काउटहरुलाई प्राथमिकता नदिई अयोग्य व्यक्तिहरुको नेतृत्वमा प्रदेश तदर्थ समिति गठन गरिएकोमा हाम्रो घोर आपति रहेको संघर्ष समितिले जनाएको छ ।
विगतमा हालको तदर्थ समितिद्वारा गरिएको रोभर मुट, वृहत तालिम तथा विज्ञापनको नाममा गरिएको खर्चको विवरण सार्वजनिक नगर्नुले हाल स्काउटमा भ्रष्टाचार मैलाउंदै गएको आरोप समेत संघर्ष समितिले लगाएको छ ।
जिल्ला स्काउट कार्यालयमा २०६८ सालमा निर्वाचित समितिहरुलाई समेत अवैधानिक करार गरी जिल्लाका संरचना भंग गर्नुको प्रमुख उद्देश्य भू माफियाको चलखेल रहेको आरोप पनि संघर्ष समितिले ज्ञापन पत्र मार्फत लगाएको छ ।
यसअघि संघर्ष समितिले स्वयंसेवी संस्थालाई दलिय भागवण्डाको आधारमा राजनितिकरण गरिएको आरोप समेत लगाएको थियो । अनुशासित तथा गैरराजनीतिक संस्था रहेको नेपाल स्काउटमा निहित स्वार्थका लागि राजनीतिक नियुक्ति गर्दै आएको आरोप समेत पटक पटक लगाउंदै आएको छ ।
राजनीतिक सदस्यता लिने इच्छुकले स्काउट त्याग्न पर्ने हुन्छ तर प्रादेशिक कमिटीमा भने पार्टीको सदस्यता रहेको निर्वाचन लडेका नेता तथा कार्यकर्तालाई नियुक्त गरिएको भन्दै समितिले आपति जनाउंदै आएको छ ।
यो विषयमा आफ्नो प्रतिक्रिया दिनुहोस् !