जनकपुरधाम, मंसिर १५ गते । पर्यटक लोभ्याउन पोखरी सरोवरहरुको शहरको रुपमा प्रख्यात जनकपुरधाममा नौका विहारका लागि पहिलो पटक डुङ्गा संचालनमा ल्याइएको छ ।
पोखरीको शहर भनिएका ऐतिहासिक नगर जनकपुरधाममा राम मन्दिर अगाडि रहेका धनुष सागर पोखरीमा गणेश युवा कमिटीको प्रयामसा जनकपुरधाम आउने पर्यटकलाई केही समय रोक्न मनोरञ्जन र आर्थिक दृष्टिकोणले ५ वटा डुङ्गा संचालनमा ल्याइएको छ ।
कमिटीको निजी लगानीमा संचालनमा ल्याएको सो डुङ्गाको विधिवत रुपमा एक कार्यक्रमका बीच प्रदेश सभा सदस्य परमेश्वर साहले उद्घाटन गरेका छन । जनकपुरधाम आउने पर्यटक जानकी मन्दिर र राम मन्दिर दर्शन मात्रै गरेर जाने गरेको थियो । तर डुङ्गा संचालनमा आएपछि पर्यटक रुक्नेछ भन्ने कमिटीको सोचाई रहेको छ ।
कमिटीका अध्यक्ष सन्तोष महतोले हाल करीब ८ लाखको लागतमा कमिटीले आफ्नै लगानीमा ५ वटा डुङ्गा ल्याइएको छ, पर्यटकको अवस्था हेरेर पछि थपिने बताए ।
यसका साथै कमिटीका उपाध्यक्ष संजय साहको प्रयासमा धनुष सागर पोखरीको सौन्दर्यकरणका लागि योजना समेत मुख्यमन्त्री स्वच्छता अभियान अन्तर्गत अघि बढाइएको छ । जसको डिपीआरका लागि सोमवारदेखि निरिक्षणको कार्य शुरु हुने जनाइएको छ ।
कार्यक्रमका प्रमुख अतिथी प्रदेश सभा सदस्य साहले पर्यटकलाई ठहराउन गणेश युवा कमिटीले डुङ्गा संचालनमा ल्याउनु राम्रो पक्ष रहेकोले अन्य संघ संस्था र प्रदेश तथा स्थानीय सरकारले पनि पर्यटक लोभ्याउने यस्ता योजनाहरु अघि ल्याउने पर्ने बताए ।
कार्यक्रममा विशिष्ट अतिथि मुख्यमन्त्री स्वच्छता अभियानका प्रमुख भगवान झाले पर्यटकको नौका विहारका लागि कमिटीले डुङ्गा संचालनमा ल्याएपछि प्रदेश सरकारले पनि सो पोखरीको सौन्दर्यकरणका लागि योजना अगाडि बढाइसकेको जानकारी दिए ।
कार्यक्रममा जिसस धनुषाका उपाध्यक्ष दिपक झा, जनकपुरधाम उपमहानगरपालिकाका उपमेयर रीता मिश्र, जनकपुरधाम ४ का अध्यक्ष सुदर्शन सिंह लगायतका वक्ताहरुले आ आफ्ना धारणा राखेका थिए । सो कार्यक्रममा उपस्थिति पत्रकार सहित विभिन्न क्षेत्रमा कार्यरत तथा योगदान पुरयाएकाहरुलाई दोसल्ला ओढाई सम्मान गरिएको थियो ।
यो विषयमा आफ्नो प्रतिक्रिया दिनुहोस् !