अञ्जली चौधरी/जनकपुरधाम, कात्तिक २६ गते । परापुर्वकाल देखि खोला, नदी तलाउ तथा पोखरी पानी भित्र पसेर मनाइने छठ पर्व यस पटक स्थानीय प्रशासनले घरबाट पानी लगेर पोखरी घाटमा बसेर मनाउन आदेश गरेको छ ।
बुधवार जिल्ला प्रशासन कार्यालय धनुषाले एक सूचना जारी गरी कोभिड १९ महामारीको दृष्टिगत गरी दिपावली र छठ जस्ता पर्व ३ फिटको भौतिक दूरी कायम गरेर मनाउन सहितका आदेश गरेको हो ।
सूचनामा तिहारमा देउसी भैलो र जुआतास नखेल्न निर्देशन सहित छठ पर्व खोला, नदी, पोखरीको पानी नपसी बाहिर भीडभाड नहुने गरी निर्देशन गरिएको छ ।
लोकपुकारसँग कुरा गर्दै सहायक प्रमुख जिल्ला अधिकरी दिपक कोइरालाले भने सम्भव भए घरमै मनाउनुपर्ने निर्णय गरिएको हो । तर छठ पर्व पानी भित्र पसेर मनाउनुपर्ने परम्परा रहेकोले वर्तमान संक्रामक अवस्थाको दृष्टिगत गरी पानी भित्र नपसी घरबाट पानी लगेर घाटमा बसेर मनाउन निर्णय गरिएको हो ।
छठ जस्तो पर्वमा भीडभाड हुन सक्ने र व्रतालु पानी भित्र पस्न सक्ने कुराको निगरानी कसले गर्ने भन्ने जिज्ञासामा उनले भने कोरोना संक्रमण सुरक्षाको दृष्टिकोणले सादा पोशाकको प्रहरी, नेपाल प्रहरी र सशस्त्र प्रहरी गरी तीन तहको सुरक्षा घेरा छठ पर्व मनाइने प्रत्येक पोखरी नदी तलाउमा राखिनेछ ।
यसका साथै बैठकबाट निर्णय विपरित जाने व्यक्ति विशेष, राजनैतिक, धार्मिक तथा सामाजिक संघ/संस्थाका पदाधिकारीहरुलाई संक्रामक रोग ऐन २०२० बमोजिम कारवाही गरिने चेतावनी समेत सूचना मार्फत स्थानीय प्रशासनले दिएको छ ।
यो विषयमा आफ्नो प्रतिक्रिया दिनुहोस् !