जनकपुरधाम, कात्तिक २५ गते । प्रदेश २ प्रमुख तिलक परियारले ‘मधेश स्वास्थ्य विज्ञान प्रतिष्ठान सम्बन्धमा व्यवस्था गर्न बनेको विधेयक प्रमाणिकरण गरेका छन् ।
कात्तिक २ गते नै प्रदेशसभाबाट पारित भएको सो विधेयक मंगलवार प्रदेश प्रमुख परियारले नेपालको संविधानको धारा २०१ को उपधारा २ बमोजिम प्रमाणीकरण गरेका हुन् ।
प्रदेश प्रमुख परिवारबाट प्रमाणीकरण भएको मधेश स्वास्थ्य विज्ञान प्रतिष्ठान १३ औं विधेयकको रुपमा रहेको छ भने हालसम्म ३५ वटा पारित भएको विधेयक प्रमाणीकरण भइसकेको प्रदेश प्रमुखको सचिवालयले जनाएको छ ।
सामाजिक विकास मन्त्री नवल किशोर साहद्वारा पेश गरिएको उक्त प्रस्ताव सभाबाट सर्वसहमत पारित भएको थियो । यो प्रस्ताव पारित भएसँगै प्रदेश २ सरकारले धरानस्थित विपी कोईराला स्वास्थ्य विज्ञान प्रतिष्ठान जस्तै यस प्रदेशमा पनि मधेस स्वास्थ्य विज्ञान प्रतिष्ठान बनाउने बाटो अब खुल्न गएको छ ।
सो विधेयकमा जनकपुरधामस्थित प्रादेशिक अस्पताल लगायतका विभिन्न अस्पताललाई विस्तार गर्ने लगायतका कुरा समेटिएकोले प्रदेश २ को स्वास्थ्य क्षेत्र ठूलो योगदान पुग्ने विश्वास लिइएको छ ।
यो विषयमा आफ्नो प्रतिक्रिया दिनुहोस् !