वीरगञ्ज, कात्तिक १३ गते । एक सातापछि पर्साको मुकेश चौरसिया हत्या घटना सम्बन्धमा मुद्दा दर्ता भएको छ ।
संघीय सत्तारुढ नेकपाका तात्कालिन माओवादी समूहले मुद्दा दर्ताको माँग गर्दै आएपनि जिल्ला प्रहरी कार्यालयले मुद्दा दर्ता नगर्दा सरकारी वकिल मार्फत मुद्दा दर्ता भएको हो ।
पर्साको विन्दवासनी गाउँपालिकाको गएको बिहीवार नेकपा गाउँ कमिटीको शपथ ग्रहण तात्कालिन एमाले र माओवादी समूहबीच पदीय भागबण्डाको विषयलाई भएको दोहरो झडपमा परी गाउँ कमिटी सचिव मुकेश चौरसियाको मृत्यु भएको थियो ।
मृतकका परिवारले जाहेरी दिएका जाहेरी प्रहरीले दर्ता नगर्दा घटना भएको दिनदेखि नै माओवादी समूहका नेकपा स्थायी समिति सदस्य एवं सांसद मातृका यादवको अगुवाईमा प्रहरी विरुद्ध आन्दोलन जारी रहेको थियो । अन्ततः बिहीवार सरकारी वकिल कार्यालय मार्फत मुद्दा दर्ता गरिएको हो ।
जाहेरीमा एमाले पूर्वसांसद राजकुमार गुप्तासहितका व्यक्तिहरुको नाम उल्लेख भएपछि प्रहरीले घटना स्थलमै नभएका व्यक्तिको विरुद्ध मुद्दा दर्ता नगर्ने भनी आनाकानी गर्दै आएको थियो । आज प्रहरीले जिल्ला सरकारी वकिलको कार्यालयमार्फत जाहेरी लिएको नेकपा वीरगञ्ज महानगरका अध्यक्ष रहवर अन्सरीले जानकारी दिए ।
बिहीवार दर्ता भएको मुद्दामा पुर्व सांसद गुप्ता सहित १३ जनामाथि ज्यान मार्ने उद्योगमा विपक्षी बनाइएको बुझिएको छ ।
प्रहरीले जाहेरी नलिएपछि मृतकको शव एक सातासम्म परिवारले बुझ्न मानेका थिएनन् । अब शव बुझ्ने र शुक्रबार बिहान पोष्टमाटम गरिने तयारी भएको अन्सारीले जानकारी दिएका । गाउँ गाउँबाट मानिसहरूको उपस्थिति गराएर शुक्रबारै अन्त्यष्टि गरिने उनले बताएका छन ।
झडप भएकै दिन प्रहरीले नेकपा पर्साका नेता राजकुमार गुप्तासहित ८ जनालाई सोधपुछका लागि नियन्त्रणमा लिएपनि माथिको टेलिफोन आएको भन्दै घटनाका मुख्यगुप्ता सहित ५ जनालाई छोडेको आरोप धर्नामा बस्नेहरूले लगाइरहेका थिए ।
यो विषयमा आफ्नो प्रतिक्रिया दिनुहोस् !