जनकपुरधाम, कात्तिक ११ गते । नेपाल सरकार शिक्षा विज्ञान तथा प्रविधि मन्त्रालय अन्तर्गतको पाठ्यक्रम विकास विकास केन्द्रद्वारा प्रकाशित कक्षा ११ को नेपाली किताबमा नेपालको पहिलो गणतान्त्रिक शहीद बारे गम्भीर त्रुटि देखिएको छ ।
लेखक बेगेन्द्र सुब्बा, देवी प्रसाद घिमिरे, रामचन्द्र खनाल र ज्ञानेश्वर निरौलाद्वारा लिखित सो किताबमा नेपालकै पहिलो प्रजातान्त्रिक योद्धा शहीद दुर्गानन्द झाको जन्म स्थान, आमाको नाम र शहादत मिति गलती लेखिएको देखा परेको छ ।
शहीद झाको जन्म धनुषा जिल्लाको जटही गाउँमा भएको हो, आमाको नाम सुकुमारी देवी झा र उनको शहादत वि.सं. २०२० माघ १५ गतेका दिन भएको थियो । तर सो किताबमा उनको जन्म सिरहा जिल्लाको जटही गाउँमा भएको, आमाको नाम देविका झा र शहादत मिति माघ ५ भएको लेखिएको छ ।
कक्षा ११ को नेपाली किताबको पृष्ट नं. ६१ मा सिर्जना र परियोजना भन्ने शिर्षकमा दिएको तस्वीर हेरेर पदावलीको आधारमा जिवनी लेख्नुस चित्र सहित विवरणमा यस्तो शहीद झा विरुद्ध यस्तो त्रुटि देखिएको छ ।
वल्र्ड ई अभिलेखालय विकीपिडीयामा समेत शहीद झाको जन्म स्थान धनुषा जिल्लाको जटही र शहादति मिति माघ १५ गते भनिएको छ । यति मात्र होइन उनका परिवार अहिलेपनि जटहीमै बस्दै आएका छन ।
नेपाल सरकारद्वारा बदनियतपुर्ण तरिकाले भावी पुस्तालाई इतिहासको बारेमा गलत जानकारी दिएर मधेश सँग विभेद र आफैमा लडाउन खोजिएको आरोप यहाँका शिक्षाविद् सहित स्थानीयवासी र नागरिक समाजका अगूवाहरुको रहेको छ ।
संचारकर्मीसँग कुरा गर्दै युवा अभियन्ता सरोज मिश्रले भने मधेश सँग विभेद गर्दै आएका नेपाल सरकारले अब भावी पुस्तालाई समेत इतिहास बारे गलत जानकारी दिएर भ्रमित गर्न खोजिएको हो । यस्ता गलत र तथ्यहीन जानकारी दिने लेखकमाथि कडाभन्दा कडा कारवाही हुनुपर्छ ।
त्यस्तै युवा अभियन्ता शुशिल कर्णले शहीद झाको जन्म धनुषा जिल्लामा भएको हो भन्ने कुरा विभिन्न प्रमाण रहेको अवस्थामा सिरहा उल्लेख गरिएकोले लोकसेवाको परीक्षा दिने विद्यार्थी के लेख्ने प्रश्न खडा भएको छ ।
उनले भने यस्ता तथ्यहीन र गलत जानकारी भूलचूकमा होइन मधेशी मधेशी बीच सत्तामा बसेकाहरुले केही लेखक मार्फत गलत कुरा उल्लेख गरी लडाउन जानी जानी गलती गराइएको हो । समाजिक संजालमा हामीले शुरुमै विरोध गरेका थियौं तर त्यसको बावजूद बजारमा विक्री वितरणका लागि पठाइएको छ ।
पत्रकार अवधेश कामतले सरकारले बदनियतपुर्ण तरिकाले मधेशी मधेशीबीच एक आपसमा लडाउन यस्तो प्रपंच गरेको आरोप लगाउंदै इतिहासलाई बंग्याउन खोजेका गलत लेख्ने सो किताबका लेखकमाथि कारवाही हुनुपर्ने मांग गरेका छन । उनले भने बजारमा विक्रीका लागि वितरण भइसकेका यस्ता इतिहास बग्याउने गरी गलत तथ्य सहितको किताब सरकारले तुरन्त संकलन गरी सच्चाउन लगाउनु पर्छ, नत्र गलत सूचना मात्रै होइन यस विरुद्ध तराई मधेशमा अलग्गै रुप लिन सक्ने अवस्था आउन सक्नेछ ।
तरुण दल धनुषाका उपाध्यक्ष राकेश विक्रम साहले खस मानसिकता बोकेका अनुभवहीन लेखकहरुबाट शहीद दुर्गानन्द झा बारे इतिहास बग्याउने गरी तथ्यहीन कुरा लेखिएको छ । भावी पुस्तालाई इतिहास बारे गलत जानकारी दिने लेखकलाई कडाभन्दा कडा कारवाही हुुनुपर्छ भने ।
हुनत किताब प्रकाशन लगतै बजारमा आउनु अघि नै यस्तो गलत तथ्य बारे समाजिक संजालमा निकै विरोध भएको थियो । तर सम्बन्धित निकायले यसप्रति कुनै चासो नदिंदा हाल यो किताब बजारमा खुल्ला रुपमै विक्री वितरण भइरहेको छ ।
यस्तो हो दुर्गानन्द झाको इतिहास
नेपालका प्रजातान्त्रिक आन्दोलनका योद्धा दुर्गानन्द झाकोे जन्म वि.सं. १९९९ साल वैशाख १४ गते धनुषाको दक्षिणी गाउँ जटहीमा आमा सुकुमारी देवी झाको गर्भबाट भएको थियो । बाबु देवनारायण झा उनी सानो छँदै बितेपछि आमा सुकुमारीले उनको पालनपोषण गरेका थिए ।
नेपालको जटही गाउँमा प्राथमिक शिक्षा पाएपछि अगाडिको पढाइ त्यहाँ नहुने भएकोले उनी माध्यमिक तहको अध्ययन भारत बिहारको उमगाउँ स्थित दिनदयाल हाईस्कुलबाट गरेका थिए । घरको एक्लो सन्तान भएकाले मेट्रिक पढ्दापढ्दै २०१७ सालमा १४ वर्षीया काशीदेवी झासित उनको विवाह भएको थियो ।
प्रजातन्त्र स्थापनाका लागि १८ वर्षको उमेरमा उनी जनकपुर भ्रमणमा आएका तात्कालिन राजा महेन्द्र शाहमाथि जानकी मन्दिरमा सेना र गुप्तचरका आँखा छल्दै बम प्रहार गरेका थिए । सो प्रहारबाट राजा महेन्द्रलाई केही भएन । तर उनी मोस्टवाण्टेडको सूचीमा परे ।
घटना पश्चात दुर्गानन्द झा भागेर भारतमा रहेको सशस्त्र क्याम्पमा पुगे । दुर्गानन्द झा फरार भएपनि उनका परिवार, आफन्त, इष्टमित्र, छरछिमेक, काङ्ग्रेस नेता लगायत ५६ जनालाई पक्राउ गरी ठूलो यातना दिइयो । दुर्गानन्द आफन्त, इष्टमित्रले पाएको यातनाबाट दुःखी भएर तत्कालीन सरकारलाई चिट्ठी लेख्दै गिरफ्तारी दिएका थिए ।
सो मुद्दाको छानविन गर्नका लागि पहिलो पटक एक विशेष अदालतको गठन गरिएको थियो । २०१९ भदौ १९ मा उनलाई कुनै सुनुवाईको मौका नै नदिई मृत्युदण्डको सजाय तोकिएको थियो । उनलाई २१ वर्षको उमेरमा २०२० साल माघ १५ गते मध्यराती केन्द्रीय कारागारमा पञ्चायत सरकारले मृत्युदण्ड दिएको थियो ।
मृत्युपछि उनको शव परिवारलाई नदिई राजा महेन्द्रले सेनालाई व्यवस्थापनका लागि दिएको कुरा नेपाली भन्छन । मृत्युदण्डपछि उनको शव परिवारजनलाई नदिइएपछि भारतको गयामा गई कुश शव बनाएर अन्तिम संस्कार गरिएको थियो ।
उनका अनुसार मृत्युदण्डको अघिल्लो दिन २०२० साल माघ १४ गते उनले आमा र श्रीमतीलाई केही बेर भेटेर सान्त्वना दिए । दुर्गानन्दलाई विभिन्न शारिरीक र मानसिक यातना दिएर माफी मागी बिन्तीपत्र लेख्न भन्दा पनि उनले टाउको निहरियाउनु भन्दा फाँसीलाई नै शिरोधार्य गरेका थिए ।
यो विषयमा आफ्नो प्रतिक्रिया दिनुहोस् !