जनकपुरधाम, कात्तिक ८ गते । जनकपुरधाममा कोरोना भाइरस संक्रमित एक महिलाको मृत्यु भएको छ ।
जनकपुरधाम उपमहानगरपालिका १ बस्ने ६५ वर्षीया महिलाको कोरोना संक्रमणले मृत्यु भएको प्रदेश स्वास्थ्य निर्देशनालयका निमित्त निर्देशक बिजयकुमार झाले बताएका छन ।
एकाएक ज्वरो लागेको र श्वास प्रश्वासमा कठिनाइ भएपछि शुक्रबार बिहान प्रादेशिक अस्पताल जनकपुरमा भर्ना गरिएकी ती महिलाको शनिवार बिहान उपचारको क्रममा मृत्यु भएको जनाइएको छ ।
निर्देशक झाले जनाए अनुसार उपचारका लागि भर्ना ती महिलामा कोरोना संक्रमणको लक्षण देखिएपछि भर्ना लगतै स्वाब परीक्षणका लागि संकलन गरिएको थियो भने राति ८ बजेतिर उनको पीसीआर रिपोर्ट पोजेटिभ आएको हो ।
उपचारमा संलग्न चिकित्सकहरुका अनुसार ति महिला उच्च रक्तचाप, मधुमेह र दम रोगी समेत रहेको थियो । धनुषामा कोरोना संक्रमित मृत्यु हुनेहरुको संख्या १९ पुगेको छ भने २ हजार १ सय ८३ जनामा संक्रमण देखिएको छ ।
यो विषयमा आफ्नो प्रतिक्रिया दिनुहोस् !