नरेन्द्र कर्ण/जनकपुरधाम, कात्तिक ७ गते । भगवानको मन्दिरमै गएर पूजाआजा गर्न सकिन्छ भन्ने अन्धविश्वासले जनकपुरधाका स्थानीयवासीले कोरोना भाइरस संक्रमणको जोखिमलाई निम्त्याउंदैछ ।
कुनैपनि धर्मग्रन्थमा भगवानको मन्दिरमै गएर पूजापाठ गरे फल प्राप्ति वा मनोकांक्षा पुरा हुने उल्लेख छैन । भगवानको पूजापाठ आस्थाको विषय हो, जुन जहाँबाट पनि गर्न सकिन्छ । भगवानले भक्तको भाव हेर्छन भावट होइन ।
तर कोरोना जस्ता महामारीको बेलामा पनि जनकपुरधाममा आस्थानको नाममा मन्दिरमै गएर पुजापाठ गर्ने अन्धविश्वासको फैसन बढेको छ ।
विजया दशमीको अवसरमा जनकपुरधाम स्थित राजदेवी मन्दिर सहित विभिन्न शक्तिपीठमा आयोजित पूजास्थलमा भाकल गरिएका भन्दा पनि मर्निंग, इभनिंग वाक र बजारमा घुमिघुमि किनमेल गर्नेहरु भगवानको दर्शन पूजापाठलाई फैसनकै रुपमा लिई जोखिमलाई निम्त्याउदै गरेको देखिएको छ ।
कोरोना भाइरस (कोभिड १९) महामारीको दृष्टिगत गर्दै दशैं अवधिभर शक्तिपीठ र पूजास्थलमा भीडभाड नगर्ने निर्देशनको बेवास्ता गर्दै प्रहरीको सुरक्षामै ठूलो भीड गरिदैछ ।
जनकपुरधाम स्थित आदिशक्ति स्वरुपा राजदेवी सहित विभिन्न शक्तिपीठहरुमा फुलपाती भित्रियाउने, खोंइच भर्ने र प्रसाद चढाउने कार्यमा प्रहरीकै सुरक्षामा कोरोनालाई चुनौती दिदैं दिनहुँ ठूलो भीडभाड गरिदैछ ।
यसैक्रममा शुक्रवार प्रहरीको सुरक्षामा फुलपाती भित्रियाउन निकालिएको नगर शोभा यात्रामा कोरोना जोखिमको बेवास्ता गर्दै आयोजक समितिबाट हजारौंको संख्या सहितको भीडलाई नगरभरी घुमाइएको छ । सो कार्यक्रममा नेपाल प्रहरी, सशस्त्र प्रहरी, नेपाली सेना र विभिन्न विशिष्ट व्यक्तिहरुको उपस्थिति रहेको थियो ।
त्यस्तै महिलाहरुले भर्ने खोंइच कार्यक्रम र प्रसाद चढाउनका लागि मन्दिर परिसरदेखि बाहिर लाईनसम्म राजदेवी मन्दिरमा हजारौं व्यक्तिको भीड आज बिहानैदेखि देखिएको छ । मन्दिरमा पुजापाठ गर्ने, प्रसाद चढाउने र खोंइच भर्ने भन्दा बढी सेल्फी खिच्ने युवा युवतीहरुको भीड बढी देखिएको छ ।
लकडाउनले गर्दा भदौ महिनासम्म सुनसान देखिने बजार किनमेल गर्नेभन्दा बढी मन्दिरको सजावट र मान्छे मेला हेर्नहरुको घुइचो बढी रहेको देखिन्छ । कोरोना भाइरसबाट आफू र अरुलाई जोगाउने दायित्व कसको सरकार कि नागरिकको भन्ने प्रश्न खडा भएको छ ।
नेपाल सरकारको निर्देशन बमोजिम स्थानीय प्रशासनद्वारा दशैंको अवसरमा हुने राजदेवी मन्दिर सहितका विभिन्न शक्तिपीठ भीडभाड हुने खालका बोकाबली प्रदान, महाप्रसाद चढाउने र खोंइच भडाई लगायतका कार्यमा रोक लगाइएको थियो ।
तर श्रद्धालु भक्तजनले आस्थाको नाम दिदैं ती निर्देशनलाई अवज्ञा गर्दै राजदेवी मन्दिर सहितका शक्तिपीठहरुमा भीडभाड गर्दै आएका छन । स्थानीय प्रशासनले त्यसलाई रोक्नुको सट्टा शान्ति सुरक्षाको नाममा संरक्षण गर्दै आएका छन ।
राजदेवी मन्दिरमा पुजा व्यवस्थापक महावीर युवा कमिटीले स्थानीय प्रशासनको निर्देशनलाई लत्याउंदै मन्दिर परिसरमा प्रत्येक दिन राति ३÷४ सयौंको भीड जम्मा गरी नाचगान सहितको रंगारंग कार्यक्रम समेत आयोजना गर्दै आएका छन ।
आयोजक समिति महावीर युवा कमिटीद्वारा गरिने भक्ति संगीत कार्यक्रम, फुलपाती भित्रियाउने कार्य, खोइच भडाई र प्रसाद चढाउने कार्यमा हुने भीड बारे जिल्ला प्रहरी कार्यालय धनुषाका प्रवक्ता डिएसपी मकेन्द्र मिश्रले भने हामी भीडभाड हुन नदिने प्रयासमा छौं तर के गर्ने श्रद्धालुको आस्था अगाडि केही गर्न सकिन्न ।
उनले भने फुलपाती कार्यक्रम, खोंइच भडाई र प्रसाद वितरण कार्यमा हामी संरक्षण होइन सुरक्षा दिइरहेका छौं । श्रद्धालु भक्तजनको आस्थासँग जोडिएको विषय भएको कारण बल प्रयोग गर्न मिल्दैन ।
भीडभाड नगर्न/गराउन हामी विभिन्न सूचना मार्फत दशैं अगावै देखि नै आयोजक कमिटी र जिल्ला प्रशासन कार्यालयको समन्वयमा सम्झाई रहेका छौं, तर के गर्ने दिनदिनै भीड बढदै गएको छ ।
कोरोना जोखिमको सम्भावना त छ तर गर्ने के त्यसलाई रोक्न बल नै प्रयोग गर्नुपर्छ, यदि हामीले बल प्रयोग गर्न खोज्यौ भने फेरी अर्कै रुप लिन्छ सम्भावित दुर्घटना पनि हुन सक्नेछ ।
राजदेवी मन्दिर सहित विभिन्न शक्तिपीठहरुमा दिनहुँ देखिने भीडले कोरोना भाइरसले यस क्षेत्रमा उग्ररुप लिने सम्भावना बढेको छ । यसलाई प्रहरी प्रशासनभन्दा पनि नागरिकको आफ्नै दायित्व प्रमुख रहेको छ ।
यो विषयमा आफ्नो प्रतिक्रिया दिनुहोस् !