जनकपुरधाम, कात्तिक ७ गते । तात्कालिन एमाले र माओवादी एकताको दुई वर्ष बितेपनि समायोजनको गुटबन्दी विवाद कायमै रहेको छ ।
केन्द्रिय तहमा समायोजन भएपनि प्रदेश, जिल्ला र नगर÷गाउँस्तरमा विवाद हालसम्म समाधान हुन नसक्दा प्रदेश २ को पर्सा जिल्लामा गाउँस्तरीय तात्कालिन माओवादी कार्यकर्ता हालको नेकपा गाउँ कमिटी सचिव मुकेश चौरसियालाई ज्यान गुमाउनु परेको छ ।
नेकपाको ओली र प्रचण्ड गुटबीच बिहीवार पदीय भागबण्डाको विवादले विन्दवासिनी गाउँपालिका सचिव मुकेश चौरसियाको हत्यालाई पार्टी तहले असन्तुष्ट पक्षबाट हमला भएको भन्दै दोषीलाई कारवाहीको मांग गरेको छ ।
चौरसियाको हत्या घटनाले पर्सामा नेकपा भित्रका तात्कालिन एमाले र माओवादीबीच आन्तरिक विवाद चुलिएको छ । पछिल्लो घटनाले माओवादी नेता कार्यकर्ताबीच एकताप्रति ठूलै आघात पुगेको देखिएको छ ।
घटनालाई माओवादी समूहले कार्यक्रममा आमन्त्रण नगर्दा आक्रमण गरिएको दाबी गर्छन भने एमाले समूहले पार्टीका असन्तुष्ट पक्षबाट आक्रमण गरिएको भन्छन । तर वास्तवमा भन्ने हो विवाद न त आमन्त्रणको छ त असन्तुष्ट पक्षकै, विवाद पार्टी कमिटीमा आफ्नो कार्यकर्तालाई समेटनु पर्नेको हो ।
करीब एक वर्षअघि नै एमाले पक्षले अध्यक्ष र माओवादी पक्षले सचिव सहितका पदमा समायोजित कमिटीको शपथ ग्रहण कार्यक्रममा कमिटीमा पद पाउन नसकेका असन्तुष्ट पक्षले गरेको आक्रमणमा परी चौरसियालाई ज्यान गुमाउनु परेको हो ।
सो झडपमा चौरसिया लगायत ८ जना घाइते भएका थिए । उनीहरुको उपचार वीरगञ्ज स्थित नारायण अंचल अस्पतालमा भइरहेको थियो । घाइते मध्ये गम्भीर अवस्थाका मुकेश चौरसियालाई सर्वोत्तम अस्पतालमा पठाइयो भने उत्तम तिवारी र चिन्टु तिवारीको उपचार नेशनल मेडिकल कलेजमा पठाइयो । चौरसियाको अवस्था गम्भीर भएपछि भेन्टिलेटरमा राखि उपचार भइरहेको क्रममा शुक्रवार बिहान मृत्यु भएको हो ।
घटना यसरी घटयो
करीब एकवर्ष पहिला नै चयन भइसकेको गाउँपालिका कमिटीको पदाधिकारीहरुको शपथ ग्रहण कार्यक्रम आयोजना गरिएको थियो ।
विन्दवासिनी ५ प्रसौनीमा आयोजित सो कार्यक्रममा कमिटी अध्यक्ष विक्रम चौरसिया र सचिव मुकेश चौरसियाबीच २५ सदस्यीय कमिटीमा आफ्ना पक्षका कार्यकर्तालाई समेत समावेश गर्न विषयलाई लिएर पहिलादेखि नै विवाद थियो । पार्टीको माथिल्लो दबावपछि दुवै पक्षको सहमतिमा प्रसौनीको भाटामा कार्यक्रम आयोजना गरियो ।
कार्यक्रम भइरहेको क्रममा ओली समूह भनिएका अध्यक्ष चौरसिया पक्षका व्यक्तिहरुले समायोजनमा पर्न नसकेका आफ्नो मान्छेलाई पनि राख्नुपर्ने भनी विवाद उत्पन्न गरियो, कार्यक्रम स्थलमै हुलदंगा गर्न मचायो ।
कार्यक्रमका लागि झ्ण्डयाइएको ब्यानर समेत च्याते दिए । विवाद बढदै जाँदा सचिव चौरसिया पक्षका व्यक्तिहरु रोक्न जान खोज्दा पहिलादेखि नै लठी र भाटा लिएर पुगेका अध्यक्ष पक्षका व्यक्तिहरुले एक्कासी लाठी प्रहार गर्न थालेको र दुर्भाग्यवश ठूलो घटना हुन गएको नाम उल्लेख नगर्ने शर्तमा कार्यक्रममा उपस्थित एक कार्यकर्ताले भनाई छ ।
नेताहरुको आ आफ्नै दाबी
वीरगञ्ज उपमहानगरपालिकाका अध्यक्ष रहवर अन्सारीले इकाजसँग कुरा गर्दै भने झगडा गर्ने मनसायले कार्यक्रममा पुगेका ओली गुटका केही कार्यकर्ताहरु हुलदंगा मचाउंदै लाठी प्रहार गरी घटना घटाएको हो ।
उनले भने ‘सपथग्रहण कार्यक्रममा सहभागीका लागि दुवै पक्षलाई जानकारी थियो तर समायोजनमा के कुरामा चित्त बुझेन अनि आएर सिधै मारपिट नै गर्न थाले,’ उनको आरोप छ ।
तर पूर्व सांसद राजकुमार गुप्ताले अर्कै कुरा बताउँछन उनले भने कार्यक्रममा पूर्वमाओवादी पक्षले तत्कालिन एमालेका नेताहरुलाई नबोलाएको कारण यस्तो अवस्था सृजना भएको दाबी गरेका छ । उनले भने एमाले पक्षका केही व्यक्तिले समायोजन प्रक्रिया नहुँदै आफूहरुको बिना जानकारी मनपरी रुपमा कार्यक्रम गर्न खोजेको भन्दै आक्रमण गरेको हो ।
यसैबीच जिल्ला अध्यक्ष प्रभु हजराले एक विज्ञप्ति जारी गरी ‘यो कुनै गुटबीचको झडप थिएन, पार्टीभित्र असन्तुष्ट व्यक्तिहरुले यस्तो गरेका छन् । समायोजनामा पद बाँडफाँड हुँदा जसले पद पाएन उनीहरुले आफ्नो असन्तुष्टि व्यक्त गर्दा झडप भएको भन्दै घटनालाई दुर्भाग्यको रुप दिएका छन ।
पार्टीसँग असम्बन्धित व्यक्तिहरु कार्यक्रम विथोल्ने उद्देश्यले पार्टी कार्यकर्ता तथा कार्यक्रम आयोजक सदस्यहरुमाथि अचानक आक्रमण गरेको भन्दै घटनामा संलग्न व्यक्तिलाई पक्राउ गरी कारवाही गर्न , मृतक चौरसियालाई सहिद घोषणा, घाइतेको उपचार लगायतका माग विज्ञप्ति मार्फत गरिएको छ ।
पार्टी अध्यक्ष प्रभु हजराले इकाजग सँग भने घटनालाई गलत र दुखदायी भनेका छन । उनले भने ‘दुई विशाल पार्टी मिलेर भएको एकतामा केही नयाँ मान्छे पनि आएका छन् । ती नयाँ मान्छे मध्येका केही व्यक्तिले समायोजनबाट असन्तुष्ट रहेका छन । असन्तुष्ट मध्येका व्यक्तिबाट नै पार्टीलाई बदनाम गर्न यस्तो घटना घटाइएको हो ।
प्रहरीले घटना संलग्न रहेको आशंका ८ जनालाई पक्राउ गरेका मध्ये नेकपाका नेता राजुकुमार गुप्ता सहित ५ जनालाई बिहिबार राती नै रिहा गरिदिएको छ भने देवा सहनी, सुकवीन गद्दी र अनिश मियालाई प्रहरी हिरासतमा राखि अनुसन्धान जारी रहेको डीएसपी मनोजीत कुँवरले जानकारी दिए ।
यो विषयमा आफ्नो प्रतिक्रिया दिनुहोस् !