जनकपुरधाम, कात्तिक ६ गते । प्रदेश २ का विभिन्न जिल्लाका ग्रामीण क्षेत्रका सडकहरुको मरम्मत सम्भार कार्य कोरोना भाइरस (कोभिड १९) महामारीले बेरोजगार भएका अतिविपन्न तथा गरीव परिवारहरुद्वारा शुरु गरिएको छ ।
अन्तर्राष्ट्रिय श्रम संगठन (आईएलओ) र सामुदायिक सुधार केन्द्र (सीआईसी) जनकपुरधामको संयुक्त साझेदारीमा संचालित परियोजना अन्तर्गत प्रदेशको ग्रामीण क्षेत्र स्थित आवश्यक सडकहरुको पहिचान गरी स्तरोन्नति तथा मरम्मत सम्भार कार्य शुरु गरिएको हो ।
प्रदेश ८ वटै जिल्लामा संचालित सो परियोजना अन्तर्गत २ सय ६५ जना बेरोजगार तथा अतिविपन्न परिवारका व्यक्तिहरुले रोजगार पाएका छन । रोजगारका साथसाथै आफ्नो गामठामको सडक राम्रो हुँदै गएपछि स्थानीय जनता निकै खुशी दिएका छन ।
प्रदेशका जिल्लाहरुमा ग्रामिण सडकहरुको मरम्त सम्भार र स्तरोन्नति हुन थालेपछि सर्वसाधारणलाई मात्र होइन सवारी साधनलाई समेत आवागमनमा सहज भएको छ । सडकको दुरावास्ताका कारण पैदल समेत हिड्न सक्ने अवस्था नरहेकोमा मरम्मत भएपछि आवात जावत गर्न सजिलो हुन थालेपछि स्थानीय निकै हर्षित रहेको कुरा सामुदायिक सुधार केन्द्रका अध्यक्ष संजय साहले बताएका छन् ।
मरम्मत सम्भारमा रोजगार पाएकाहरुलाई सुरक्षा सामग्री लगायत मर्मत संभारका सम्पूर्ण औजारहरु दिइएको छ भने स्वास्थ्यको दृष्टिगत गर्दै तिनीहरुलाई कोरोना बीमा समेत गरिएको उनले बताए ।
धनुषामा रत्नमाया बुलन, महोत्तरीमा सुरेश चमार, सर्लाहीमा उत्तिमलाल माझी, सिरहामा शोभादेवी पासवान, सप्तरीमा इन्द्रकला देवी सादा, रौतहटमा जयलाल दास तत्मा, बारामा बसन्ती देवी दुसाध र पर्सामा अरिपफ मियाको नेतृत्वमा रोजागर पाएका सयौं व्यक्तिहरु सडक मरम्मत सम्भारको कार्य गर्दै आएको जनाइएको छ ।
यो विषयमा आफ्नो प्रतिक्रिया दिनुहोस् !