जनकपुरधाम, कात्तिक २ गते । छठ पर्वपछि प्रदेश २ सरकारले प्रहरी भर्ना विज्ञापन खोल्ने भएको छ ।
आइतवार मन्त्रिपरिषद्को बसेको बैठकबाट प्रदेशको शान्ति सुरक्षाका लागि सरकारको आफ्नै प्रहरी आवश्यक भएको ठहर गर्दै छठपछि भर्ना प्रक्रिया अगाडि बढाउने निर्णय गरिएको हो ।
मुख्यमन्त्री निवासमा सम्पन्न सो बैठकमा भएको निर्णय बारे जानकारी दिदैं सरकारका प्रवक्ता एवं आन्तरिक मामिला तथा कानून मन्त्री ज्ञानेन्द्र यादवले भने प्रहरी जवान, असई, सई र इन्सपेक्टर सहितका पदमा प्रदेश लोक सेवाको समन्वयमा प्रदेश सरकारले भर्ना प्रक्रिया बढाउने भएको छ ।
तर के कति पदमा भर्ना गरिने जिज्ञासामा मन्त्री यादवले त्यो मापदण्ड तयार भएपछि आवश्यकताको हिसाबले संख्या तय गरिने बताए । हुनत प्रदेश प्रहरी विधेयक पारित भएको एक वर्षभन्दा बढी समय भइसकेको छ ।
संघीय सरकारले समेत प्रहरी भर्ना लागेको अवस्थामा प्रदेश सरकारले पनि भर्ना गर्नु कतिको जायज हो भन्ने संचारकर्मीको जिज्ञासामा उनले आवश्यकता अनुसार कर्मचारी भर्ना गर्न पाउने प्रदेशलाई संवैधानिक छ, तर संघीय सरकारले सो अधिकारलाई मिचेर संघीयतालाई धरापमा पार्न लागेको आरोप लगाए ।
साथै बैठकबाट प्रदेशसभाको चौथो अधिवेशन अन्त्य गर्ने सहमति भएको मन्त्री यादवले जानकारी दिए । यसका अतिरिक्त प्रदेश सरकारको कर्मचारीहरुको सरुवा तथा काज सम्बन्धि कार्यविधि २०७७ स्वीकृत गर्ने, प्रदेशको राजपत्र निर्देशिका २०७७को मस्यौदा स्वीकृत गर्ने निर्णय गरिएको छ ।
प्रदेश विपत व्यवस्थापन सम्बन्धि प्रदेशको मस्यौदा निर्माणका लागि सैद्धान्तिक सहमति र दलित विकास समितिको उपाध्यक्ष पदको नियुक्ति गर्ने निर्णय पनि गरिएको जानकारी समेत उनले दिएका छन ।
यो विषयमा आफ्नो प्रतिक्रिया दिनुहोस् !