जनकपुरधाम, कात्तिक १ गते । कोरोना भाइरस चेकजाँचको क्षमता विस्तारका लागि यूएनडीपीले प्रदेश २ स्थित जनस्वास्थ्य प्रयोगशालालाई आरएनए एब्सट्रेक्सन मेसिन सहयोग गरेको छ ।
शनिवार प्रादेशिक जनस्वास्थ्य प्रयोगशालाको प्रथम वार्षिकोत्सवको अवसरमा आयोजित कार्यक्रममा यूएनडिपीका प्रदेश प्रमुख धनबहादुर चन्द्रले सो मेसिन मुख्यमन्त्री लाललाबु राउतलाई हस्तान्तरण गरेका थिए ।
कोरोना भाइरस पता लगाउन स्वाब परीक्षणमा सरकारलाई सहजता पुरयाउन यूएनडीपीले देशका ७ वटै प्रदेशमा आरएनए एब्सट्रेक्सन मेसिन सहितका विभिन्न उपकरण योजना अन्तर्गत प्रदेश २ लाई सहयोग गरेको हो ।
सो योजना अन्तर्गत प्रदेश १ मा उपलब्ध गराई सकिएको छ भने बागमती, गण्डकी, लुम्बिनी, सुदुरपश्चिम प्रदेशलाई चाँडै नै उपलब्ध गराइने प्रमुख चन्दले जानकारी दिएका छन । प्रदेश २ लाई भेन्टीलेटर र आक्सिजन कन्सटेंटर सहितका सामाग्री पनि छिट्टै उपलब्ध गराउने बताए ।
यूएनडीपीले ३५ लागत रहेको उपलब्ध गराएको सो आरएनए एब्सट्रेक्सन मेसिनले दुई घण्टामा रिजल्ट दिने स्वाब परीक्षणका लागि पीसीआर मेसिनको क्षमता बढाई २५ मिनेटमै रिजल्ट दिनेछ । सो मेसिन जडान भएपछि प्रादेशिक ल्याबबाट बढीभन्दा बढी पीसीआर चेकजाँच हुने विश्वास लिइएको छ ।
वार्षिकोत्सव कार्यक्रमलाई सम्बोधन गर्दै मुख्यमन्त्री लालबाबु राउतले पीसीआर चेकजाँच क्षमता बढाउन मेसिन सहयोग गरे वापत धन्यवाद ज्ञापन गर्दै अन्य संघ संस्थालाई समेत तालिम गोष्ठी लगायतका कार्यक्रममा रकम खर्च नगरी शिक्षा र स्वास्थ्य क्षेत्रमा जनतालाई प्रत्यक्ष लाभ दिने कार्यमा सहयोग गर्न आग्रह गरे ।
मुख्यमन्त्री राउतले प्रादेशिक जनस्वास्थ्य प्रयोगशालाको क्षमता विकासका लागि प्रदेश सरकारको पूर्ण सहयोग रहने प्रतिबद्धता जनाउंदै कर्मचारी, पुर्वाधार सहितका श्रोतको साधनको आभावका बीच प्रयोगशालाले सफलतापुर्वक कार्य गर्दै आएकोमा समेत धन्यवाद दिएका थिए ।
कार्यक्रममा सामाजिक विकासमन्त्री नलव किशोर साहले प्रयोगशालाई अत्याधुनिक बनाउनका लागि सवै प्रकारको सहयोग गर्नका लागि तयार रहेको प्रतिबद्धता जनाएका थिए ।
प्रयोगशालाका निर्देशक डा. श्रवण कुमार मिश्रको अध्यक्षतामा सम्पन्न सो कार्यक्रममा सामाजिक विकास राज्य मन्त्री अभिराम शर्मा, मन्त्रालयका सचिव कृष्णप्रसाद कापरी, मुख्यन्यायाधिवक्ता दिपेन्द्र झा लगायतका वक्ताहरुले पनि आ आफ्ना धारणा राखेका थिए ।
यो विषयमा आफ्नो प्रतिक्रिया दिनुहोस् !