जनकपुरधाम, असोज ३० गते । कोरोना भाइरसबाट बच्न भगवानको पूजापाठ समेत बन्द गरिएको अवस्थामा जनता समाजवादी पार्टीले पार्टी प्रवेश आयोजना गरेको छ ।
स्थानीय प्रशासनको निर्देशनलाई लत्याउंदै जसपा नेपालले सांगठनिक शक्ति मजबूत पार्न धनुषा सहित प्रदेश २ का विभिन्न जिल्लामा जसपाले पार्टी प्रवेशको अभियान नै चलाएको छ । सोही क्रममा शुक्रवार हजारौको संख्यामा भीडभाड गराई सबैला पार्टी प्रवेश कार्यक्रम सम्पन्न गरेको छ ।
सार्वजनिक कार्यक्रम नगर्न/गराउन पटक निर्देशन दिदै आएका प्रदेश २ सरकारका नेतृत्वकर्ता मुख्यमन्त्री लालबाबु राउत सहित सरकारका विभिन्न मन्त्री र सत्तारुढ पार्टी नेतृत्वकर्ताको उपस्थितिमा जनताको स्वास्थ्यसँग खेलवाड गर्दै पार्टी प्रवेश कार्यक्रम आयोजना गरिएको हो ।
नेपाल सरकारको निर्देशनलाई लत्याउंदै कोरोना भाइरस मापदण्ड विपरित हजारौ संख्यामा भीडभाड गराई पार्टी प्रवेश कार्यक्रमले सहभागी जनतामा पर्न सक्ने स्वास्थ्यमा नाकारात्मक प्रभाव बारे पार्टी नेतृत्वकर्ताहरुले सम्पर्क गर्न खोज्दा कसैले फोन उठाएनन ।
राजधानी काठमाडौ सहित केही जिल्लाका विभिन्न स्थान र कार्यालयहरुमा विभिन्न सेवाहरु बन्द समेत गरिएको छ । तर धनुषामा हजारौको भीड गराई यसलाई बेवास्ता गरिएको छ । पार्टी प्रवेशमा हजारौको भीड हुँदा पनि स्थानीय प्रशासनले कुनै रोकटोक नगरी बरु सुरक्षा नै प्रदान गरेको छ ।
जसपा नेपाल मात्रै होइन पूर्व मन्त्री एवं नेकपा नेता मातृका यादवको अगुवाईमा समेत जिल्लाको विभिन्न स्थानमा भिडभाड जम्मा गरी पार्टी प्रवेश कार्यक्रम गर्दै आएका छन । तर प्रशासनले कुनै रोकटोक गरेको छैन ।
कोरोना भाइरसलाई मध्यनजर गर्दै गृह मन्त्रालयले आज ७७ वटै जिल्ला प्रशासन कार्यालयलाई हिन्दुहरुको महापर्व विजयादशमीमा विभिन्न शक्तिपिठ तथा मठमन्दिरमा हुने बोकाबली र भीडभाड हुने सहितका पुजापाठमा रोक लगाउंदै नित्य पूजा मात्र गर्न निर्देशन दिएको छ ।
पार्टी प्रवेश कार्यक्र बारे प्रमुख जिल्ला अधिकारी प्रेम प्रसाद भट्टराईसँग जिज्ञासा राख्दा उनले अनभिज्ञता प्रकट गर्दै भने कहाँ पार्टी प्रवेश कार्यक्रम भइरहेको छ, आफूलाई थाहा छैन, यदि त्यस्तो कही भइरहेको भने जानकारी गराउनुस रोक्न लगाउँछु ।
सो पार्टी कार्यक्रममा जसपाका वरिष्ठ नेता राजेन्द्र महतो, प्रदेश २ का मुख्यमन्त्री लालबाबु राउत, भौतिक पूर्वाधार विकास मन्त्री जितेन्द्र सोनल, सामाजिक विकास मन्त्री नबल किशोर साह, उद्योग पर्यटन वन तथा वातावरण मन्त्री नरेश राय, कृषि राज्यमन्त्री योगेन्द्र राय यादव, संघिय सांसद अनिल कुमार झा, उमाशंकर अरगरिया लगायतका दर्जनौ प्रदेश सांसद र नेताहरुको व्यक्तिहरुको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !