जनकपुरधाम असोज ३० गते । प्रदेश २ सरकार परिवर्तनको कुरा सत्तारुढ दल जनता समाजवादी पार्टी (जसपा) नेपालबाटै उठिरहेको बेला पार्टी नेतृत्वकर्ताले समायोजन प्रक्रियापछि मात्रै सरकार परिवर्तन हुने बताएका छन ।
प्रदेशको अस्थायी राजधानी जनकपुरधाममा बिहीवार जसपा केन्द्रिय अध्यक्ष उपेन्द्र यादवसँग संसदीय दलको बैठकमा प्रदेश सांसदहरुले मुख्यमन्त्री सहित सरकारमा सहभागी मन्त्रीको क्रियाकलापप्रति चर्को आलोचना गर्दै तत्काल परिवर्तनको मांग गरेका छन ।
सांसदहरुको मांग बारे अध्यक्ष यादवले भन्ने बितिकै सरकार परिवर्तन नभई समायोजन र विधान सहितका विधि प्रक्रिया पुरयाएर मात्र हुने प्रतिक्रिया दिएका थिए । बैठकमा प्रदेश सांसदहरुले सरकार नेतृत्वकर्ता मुख्यमन्त्री लालबाबु राउत, सामाजिक विकास मन्त्री नवलकिशोर साह र उद्योग, पर्यटन, वन तथा वातावरण मन्त्री रामनरेश रायको क्रियाकलाप जनताको चाहना अनुसार नभएको भनी आलोचना गरेका थिए ।
बैठकमा सहभागी २४ सांसद मध्ये १९ जना प्रदेश सांसदले मुख्यमन्त्री राउत र सरकारका अन्य मन्त्रीको कार्य जनताप्रति उत्तरदायी नभई व्यक्तिगत स्वार्थमा पदीय दुरुपयोग गर्दै आएको भने चर्को आलोचना गरेका थिए भने मात्र ३ जना सांसदले सरकारको क्रियाकलाप राम्रो रहेको धारणा थिए । अन्य २ जना सांसद मध्यमार्गी बाटो खोज्दै तटस्थ बसे ।
नाम उल्लेख नगर्ने शर्तमा बैठकमा सहभागी एक सांसदले भने प्रदेश सांसदहरु मात्रै नभई केही मन्त्री समेत समीक्षात्मक मनतव्य राख्दै मुख्यमन्त्री राउत र केही मन्त्रीको कारण सरकार र पार्टी दुवै बदनाम भइरहेको भनी धारणा राखेका थिए । उनका अनुसार बैठकमा सहभागी सांसदहरुले समाजिक विकास मन्त्री बनेका नवलकिशोर साह र उद्योग, वन, पर्यटन तथा वातावरण मन्त्री रामनरेश रायको कार्यशैलीप्रति आलोचना गर्दै तिनीहरुको छोरा मन्त्रालय चलाउंदै आएको आरोप लगाउंदै तिनीहरुको मन्त्रालयमा परिवारबाद हाबी भएको आरोप लगाएका थिए ।
बैठकमा सहभागी सांसद मनिष सुमनले लोकपुकारसंग गर्दै भने सांसदहरुले तात्कालिन राष्ट्रिय जनता पार्टी नेपाल र समाजवादी पार्टी एकीकरण भइसकेको अवस्थामा संसदीय प्रावधान अनुसार एकीकरण पश्चात संसदीय दलको निर्वाचन गरी सरकारको नेतृत्व परिवर्तन गर्न गरेको मांगप्रति अध्यक्ष यादवले सरकार परिवर्तन तत्काल सम्भव नरहेको भनी समायोजन र विधान तयार पश्चात मात्र हुने प्रतिक्रिया दिएका थिए ।
बैठकबाट जनता समाजवादी पार्टी नेपाल, प्रदेश २ को संसदीय दलको विधान तयारीका लागि समिति समेत गठन गरिएको छ । विधान तयारीका जिम्मेवारी सांसद रामआशिस यादव, मनिषकुमार सुमन, परमेश्वर साह, उपेन्द्र महतो, रानीकुमारी शर्मा तिवारीलाई दिइएको उनले जानकारी दिएका छन ।
सो विधान तयारी समितिले ७ दिनभित्र विधान तयार पारेर दिएपछि समायोजन र निर्वाचन प्रक्रिया अघि बढाइने बताइएको छ । विधान तयारी नहुँदै मुख्यमन्त्री र मन्त्री बन्ने होडमा सांसदहरु आन्तरिक लबीमा जुटिसकेका छन ।
प्रदेश सरकार परिवर्तन बारे जसपा नेपालका केन्द्रिय सदस्य महेन्द्र राय यादवले केन्द्रिय कमिटिमा प्रदेश सरकार परिवर्तन बारे अहिलेसम्म कुनै छलफल नै भएको छैन समायोजन प्रक्रिया सम्पन्न भएपछि मात्रै सरकार परिवर्तन हुने बताएका छन ।
प्रदेश सांसदहरु सरकार परिवर्तनको मांग गर्दै आइरहेको भन्ने प्रसंगमा उनले भने चुनाव जितेर आएकाहरुको मन्त्री बन्ने आकांक्षा हुन्छ त्यो स्वभाविक पनि हो, तर कसैले भन्दै सरकार त परिवर्तन गर्न सकिदैन नियम, विधि प्रक्रिया पुरयाएर मात्रै परिवर्तन गर्न सकिने हो ।
पछिल्लो पटक सांसद उपेन्द्र महतोको नेतृत्वमा आधा दर्जनभन्दा बढी सांसदहरुले सरकार नेतृत्वकर्ता जनताप्रति उत्तरदायी नभई परिवारवाद र जातिवादमा लागेको भनी सरकार परिवर्तनको मांग गर्दै पार्टी नेतृत्वकर्तालाई ज्ञापन पत्र नै बुझाएका थिए ।
पार्टी श्रोतले जनाए अनुसार आगामी कात्तिक ३ र ४ गते बस्ने केन्द्रिय कमिटीको बैठकमा समायोजन र प्रदेश सरकार परिवर्तन बारे छलफल हुनेछ । सो समायोजन प्रक्रियाका लागि निर्देशिका बैठकबाट तयार गर्ने जिम्मेवारी दिइने छ ।
यो विषयमा आफ्नो प्रतिक्रिया दिनुहोस् !