मलगंवा, असोज २८ गते । सर्लाहीमा नेपाली कांग्रेसका कार्यकर्ता र प्रहरीबीच भएको झडपमा परी करीब ४ दर्जन व्यक्ति घाइते भएको छ ।
बुधवार आफ्ना कार्यकर्ताको हत्यारालाई कारबाहीको माग गर्दै नेपाली कांग्रेसका नेता/कार्यकर्ताले जिल्ला प्रहरी कार्यालय परिसरमा प्रदर्शन गर्न खोज्दा प्रहरीले बल प्रयोग गरेपछि दुवै पक्षबीच झड्प भएको थियो । सो झडपमा प्रहरी तर्फ डीएसपीसहित २२ जना र प्रदर्शनकारीतर्फ करीब दुई व्यक्ति घाइते भएको जनाइएको छ ।
रामनगर गाउँपालिका वडानम्बर ७ मा हत्या गरिएका महेन्द्र रामको हत्यारालाई कारबाही गर्नुपर्ने, रामलाई शहीद घोषणा गर्नुपर्ने र पीडित परिवारलाई क्षतिपूर्ति उपलब्ध गराउनु पर्ने माग गर्दै झाडु, प्लेकार्डसहित प्रदर्शनकारी जिल्ला प्रहरी कार्यालय पुगेका थिए ।
कांग्रेसका नेताहरुले शान्तिपूर्ण प्रदर्शन गर्दा प्रहरीले एक्कासी बल प्रयोग गरेको दाबी गरेका छन् । तर प्रदर्शनकारीले तोड्फोड गर्न थालेपछि बल प्रयोग गर्दै अश्रु ग्याँस प्रहार गर्नुपरेको डीएसपी एवं प्रवक्ता मदन कुँवरले बताए ।
प्रदर्शनकारीहरु प्रहरी कार्यालय गेट अगाडि आउन बितिकै ढुंगामुढा गर्न थालेपछि अवस्था नियन्त्रण गर्न बल प्रयोग गर्नु परेको डिएसपी कुँवरले बताएका छन । उनले भने प्रदर्शनकारीहरुले प्रहरी कार्यालयको झ्यालका सिसासमेत फुटाइदिएका छन ।
ठूलो संख्यामा रहेको प्रदर्शनलाई नियन्त्रण गर्न प्रहरीले ३१ राउण्ड अश्रु ग्याँस प्रहार र सामान्य बल प्रयोग गर्नु परेको उनको भनाई छ ।
यो विषयमा आफ्नो प्रतिक्रिया दिनुहोस् !