जनकपुरधाम, असोज २३ गते । सेवाग्राहीको चाप बढदै गएपछि जिल्ला प्रशासन कार्यालय धनुषाले शनिवार समेत सेवा प्रदान गर्ने सहितका समय तालिका सार्वजनिक गरेको छ ।
कोरोना संक्रमणको रोकथाम तथा नियन्त्रणलाई मध्यनजर गर्दै कार्यालय परिसरमा हुने भिडभाड र सेवाग्राहीको चाप सहज बनाउने उद्देश्यले स्थानीय तह अनुसार कार्यतालिका सार्वजनिक गरिएको कुरा सहायक प्रमुख जिल्ला अधिकारी दिपक कोइरालाले बताएका छन ।
शुक्रवारदेखि नै लागू हुने गरी तालिका अनुसार सेवाग्राहीलाई सहज ढंगले सेवा प्रवाह गर्ने व्यवस्था अनुसार कामकारवाही अघि बढाइएको उनले बताए । तोकिएको दिन मिलाएर मात्र सम्बन्धित सेवाग्राही कार्यालयमा आउनुपर्ने, नागरिकता र नाबालक परिचयपत्र बनाउने हकमा सेवाग्राही र सनाखत गर्ने थप १ जनामा मात्र कार्यालयमा कार्यालय परिसरमा प्रवेश गर्न सकिने कुरा जारी सुचनामा भनिएको छ ।
सेवा लिन आउने सेवाग्राहीहरुले अनिवार्यरुपमा स्वास्थ्य सम्बन्धि मापदण्ड पालना गर्नुपर्ने उल्लेख छ । रुखा खोकी, ज्वरो जस्ता लक्षण देखिएका सेवाग्राहीलाई कार्यालयमा प्रवेश गर्न नदिने सूचनामा उल्लेख छ । कार्यालयको भीडभाड र कोभिड १९ संक्रमणको अवस्था अनुसार उल्लेखित तालिकामा आवश्यकता अनुसार थपघट र परिमार्जन गर्दै लगिने सहायक प्रमुख जिल्ला अधिकारी कोइरालाले जानकारी दिए ।
संघ/संस्था दर्ता र नविकरण आईतवारदेखि बुधवार सम्म र पत्रपत्रिका÷छापाखाना दर्ता र विधान संशोधन सम्बन्धी सेवा बिहिवार र शुक्रवार मात्र दिइने र सक्कल नागरिकता प्रमाणपत्र, नागरिकता प्रतिलिपी र राहदानी लगायतका अन्य सेवाहरु स्थानीय तहले पाएको दिन अनुसार प्रदान गरिने भन्ने सुचनामा उल्लेख छ ।
आईतबार हँसपुरन नगरपालिका, धनुषाधाम नगरपालिका र विदेश नगरपालिका, सोमबार नगराईन नगरपालिका, सबैला नगरपालिका, गणेशमान चारनाथ नगरपालिका, मंगलबार जनकपुरधाम उपमहानगरपालिका, मिथिला विहारी नगरपालिका, बुधाबार जनकनन्दनी गाउपालिका, लक्ष्मीनिया गाउपालिका र औरही गाउँपालिका, बिहिबार जनकपुरधाम उपमहानगरपालिका र मुखियापट्टी मुसहरनीया गाउपालिका र शुक्रबार कमला नगरपालिका, धनौजी गाउपालिका र शहिदनगर नगरपालिकालाई सेवा उपलब्ध हुने छ ।
त्यस्तै शनिबार क्षीरेश्वरनाथ नगरपालिका, बटेश्वर गाउपालिका र मिथिला नगरपालिकाका सेवाग्राहीहरुलाई १० बजे देखि दिउसो ३ बजेसम्म सेवा प्रवाह गरिने सहायक प्रमुख जिल्ला अधिकारी कोइरालाले जानकारी दिए ।
यो विषयमा आफ्नो प्रतिक्रिया दिनुहोस् !