जनकपुरधाम, असोज २१ गते । प्रधानमन्त्री केपी शर्मा ओलीको विरोधमा अनसनरत डा.गोविन्द केसीको समर्थकहरुले जनकपुरधाममा प्रदर्शन गरिएको छ ।
चिकित्सा शिक्षा सुधारको माग गर्दै २४ दिनदेखि अनसरत डा. केसीको मांगप्रति समर्थन जनाउंदै कोभिड–१९ क्विक रेस्पोन्स टिम र जनकपुरधामका युवाहरुको संयुक्त आयोजनामा जनकपुरधाम स्थित रामानन्द चोकमा बुधबार साँझ विरोध प्रदर्शन गरिएको हो ।
डा.केसीको समर्थन एवं उनको जीवन रक्षा तथा जायज मागहरूप्रति ऐक्यबद्धता र संघिय सरकारको गैरजिम्मेवारीपनकाबिरूद्ध आफुहरुले शान्तिपूर्ण विरोध प्रदर्शन गरेको नेपाल तरुण दल धनुषाका उपाध्यक्ष राकेश बिक्रम साहले जानकारी दिए ।
स्वास्थ्य र मेडिकल शिक्षामा सुधार तथा सुशासनका लागि डा.केसीले १९औं सत्याग्रह सुरु गरेको आज २४ औं दिन भइसकेको छ । उनको स्वास्थ्य नाजुक बन्दै गईरहेको छ । तर, सरकारले भने अझैपनि उनको माग पूरा गर्न र जीवनरक्षाका लागि कुनै कदम चालेको छैन् ।
डा.केसी व्यक्ति होईन् आवाज हो, केपी ओली सरकार मुर्दावाद, स्वास्थ्यमन्त्री मुर्दावाद, हाम्रो स्वास्थ्य हाम्रै हातमा, हामी डाक्टर केसीको साथमा, लुटतन्त्र बन्द गर, डा.गोवीन्द केसीको जीवन रक्षा गर, आवर रियल हिरो डा.गोवीन्द केसी, यहाँ राजदुतको चिन्ता छ हजुर, के तिमी सत्याग्रह सत्याग्रह कराउँछौ, नागरिक सरोकार बिरोधी सरकार मुर्दावाद, मेडिकल माफियाको दादागिरी बन्द गर, डा.गोवीन्द केसीको माग पुरा गरलगायतका नारा लेखिएको प्लेकार्ड सहित उनीहरूले प्रदर्शन गरेका छन् ।
विरोध प्रदर्शनमा नेपाली काँग्रेसका नगर सभापति मनोज साह, जिवनाथ चौधरी, वडा नम्बर–७ का वडाध्यक्ष जानकीराम साह, क्विक रेस्पोन्स टिमका डा.सज्जन ठाकुर, अनुष पाण्डेय, दिपक ठाकुर, बलराम गुप्ता, रमेश यादव, काँग्रेस नेतृ सम्झना वर्मा, मधेश अधिकार संघर्ष समितिका सरोज कुमार मिश्र, यानका राहुलराज साह, नेविसंघ महोत्तरीका जिल्ला नेता आशुतोष झा लगायतका दर्जनौं नेता कार्यकर्ताहरुको सहभागिता रहेको थियो ।
डाक्टर केसीले चिकित्सा शिक्षा सुधारलगायतका मागसहित भदौ २९ गते जुम्लाबाट १९ औं अनसन सुरु गरेका थिए । उनलाई असोज ६ गते काठमाडौं लगिएको थियो ।
यो विषयमा आफ्नो प्रतिक्रिया दिनुहोस् !