जनकपुरधाम, असोज १५ गते । जनकपुरधाम स्थित विभिन्न संघ संस्थाहरुले नेपाल–भारत सीमा खुलाउन प्रधानमन्त्री केपी शर्मा ओलीलाई ज्ञापनपत्र बुझाएका छन् ।
प्रमुख जिल्ला अधिकारीलाई संयुक्त रुपमा बुझाइएको सो ज्ञापन पत्रमा सीमा बन्दका कारण नेपाल भारत सीमा क्षेत्रमा रहेका दुबै देशका जनतालाई निकै कठिनाई भइरहेको भन्दै कोरोनाको कारण इतिहासमा पहिलो चोटी नेपाल भारतको सुमधुर सम्वन्धमा तिक्तता आएको भनिएको छ ।
नेपाल–भारत खुल्ला सीमा सम्वाद समूहका अध्यक्ष राजीव झाको नेतृत्वमा गएको टोलीले बुझाएको ज्ञापन पत्रमा नेपाल र भारतका नीति निर्माण गर्ने व्यक्तिहरुको गलत सोच र दिशानिर्देशनको कारण पछिल्लो केही महिनादेखि दुबैतिरको जनतालाई दुःख भोग्न बाध्य भएको भन्ने कुरा दाबी गरिएको छ ।
जिल्ला प्रशासन कार्यालय धनुषामार्फत् प्रधानमन्त्रीलाई बुझाएको ज्ञापनमा ‘आपत विपतको बेला नेपाल भारतको सीमा बन्द हुँदा भारतबाट आँखाको उपचार गराउन नेपाल आउने र नेपालबाट अन्य रोगको उपचार गराउन भारत जाने बिरामीहरु विचल्लीमा परि कयौं जना त ज्यान गुमाइसकेको अवस्था छ ।’
सन १९५० को सन्धी अनुसार नेपाल भारत निर्वाधरुपमा आवागमन सहज गर्नु पर्छ । बेटीरोटीको सम्बन्ध रहेको कुरो एकातर्फ छ भने अर्काेतर्फ एकअर्काको विवाह, पूजा, मरणहरणमा सहभागि हुन नपाएका अवस्था बनेको छ ।
सीमा बन्द भन्दा पनि सर्तकताले कोरोना घट्ने हो । सीमा कुनै त्यस्तो समस्या देखिदैछ भने त्यहाँ स्वास्थ्यकर्मी राखिनुपर्छ जसले कोरोनाबाट बच्न जानकारी गराउँछन् । अहिलेको परिस्थितिमा सीमालाई बन्द गरेर राख्नुको औचित्य नभएकोले सीमाक्षेत्रमा चाडै आबत जाबत सहज गर्नुपर्ने मांग गरिएको छ ।
ज्ञापन पत्र बुझाउनेहरुमा नेपाल भारत खुल्ला सीमा सम्वाद समूह, नेपाल उद्योग वाणिज्य महासंघ–प्रदेश २, माँ जानकी यातायात प्रालि, जनकपुरधाम, लोकतान्त्रिक युवा नागरिक समाज, फलफुल व्यवसायी संघ, जनकपुरधाम, धनुषा चेम्बर अफ कमर्स, जनकपुर अञ्चल ग्यास व्यवसायी संघ, जिरोमाइल युवा कमिटी र क्लोथ बैंक नेपाल रहेको छ ।
सो ज्ञापन पत्रमा गृह मन्त्रालय, परराष्ट्र मन्त्रालय र प्रदेश २ को मुख्यमन्त्री कार्यालयलाई बोद्यार्थ जनाइएको छ ।
यो विषयमा आफ्नो प्रतिक्रिया दिनुहोस् !