जनकपुरधाम, असोज १३ गते । धनुषाको सबैलामा प्रहरी हिरासतमै मृत्यु भएका शम्भु सदाको घटनाको अध्ययन गर्न मानवअधिकार सहितको संघीय सांसद टोली जनकपुरधाम आएका छन ।
जनकपुरधाम आएका प्रतिनिधिसभाको कानुन, न्याय तथा मानवअधिकार समितिको टोली मंगलबार सरोकारवालासँग घटना सम्बन्धमा जानकारी लिंदै छलफल गरेका छन ।
उक्त समितिका पदाधिकारीले सबैलास्थित इलाका प्रहरी कार्यालयको हिरासतभित्रै मृत्यु भएका शम्भु सदाका परिवारसँग छलफल समेत गरेका छन् । मृतक सदाको घर पुगेर मृतक सदाका आमा, श्रीमति र छिमेकीहरुसँग घटनाबारे जानकारी लिइएको कुरा समितिका सदस्य एवं धनुषाका प्रतिनिधि सभा सांसद उमाशंकर अरगरियाले बताएका छन ।
उनले नागरिक आन्दोलनका अभियन्ता, प्रमुख जिल्ला अधिकारी, जिल्ला न्यायाधिवक्ता सँग पनि शम्भु सदाको घटना बारे टोलीले जानकारी लिएको छ ।
सवारी ज्यान मुद्दामा पक्राउ परेका सबैला निवासी २३ वर्षिय शम्भु सदा इलाका प्रहरी कार्यालय सबैलाको हिरासतमा रहेका जेठ २७ गतेका दिन प्रहरी कार्यालयको शौचालयभित्र झुण्डिएको अवस्थामा मृत फेला परेको थियो । दलितसँग आबद्ध संघ संस्था, स्थानीय र शम्भुका परिवारले प्रहरीको यातानाको कारण मृत्यु भएको आरोप लगाउंदै आएका छन ।
नेपाल कम्युनिष्ट पार्टी (नेकपा) का सांसद शेरबहादुर तामाङको संयोजकत्वमा गठित सो संसदीय अध्ययन समितिमा जसपाका सांसद अरगरिया सहित नेपाली कांग्रेसका पदमनारायण चौधरी र मीनबहादुर विश्वकर्मा, नेकपाका लालबहादुर थापा र समीमा हुसैन सदस्य रहेका छन ।
देशका विभिन्न स्थानको हिरासतमा मृत्यु भएका घटनाका स्थलगत अध्ययनका लागि केही दिनअघि उक्त समितिद्वारा ६ सदस्यीय अध्ययन समिति गठन गरिएको थियो ।
समितिका पदाधिकारी धनुषाबाट टोली रौतहटतर्फ जाने सदस्य अरगरियाले बताएका छन । इलाका प्रहरी कार्यालय गरुडाको हिरासतमा प्रहरीको यातनाबाट मृत्यु भएका विजय राम र रौतहटमै हत्या भएका निरञ्जन रामको परिवार तथा सरोकारवालालाई बुधबार भेटेर घटनाको अध्ययन गरिने बताइएको छ ।
यो विषयमा आफ्नो प्रतिक्रिया दिनुहोस् !