काठमाडौ, असोज ९ गते । चालु आर्थिक वर्षको दुई महिनामा नेपालमा ५ करोड किलोभन्दा बढी चिनीको आयात भएको छ ।
भन्सार विभागले सार्वजनिक गरेको तथ्यांक अनुसार साउन र भदौ गरी दुई महिनामा मात्रै पाँच करोड ५ लाख १० हजार ७७ किलो चिनी नेपाल भित्रिएको छ । गत वर्ष सोही समयमा एक लाख ६८ हजार किलो मात्रै चिनी भएको थियो ।
अन्तर्राष्ट्रिय भन्सार कारोबार संकेत (हार्मोनाईजेसन कोड) १७०११३९० र १७०११४९० मा शुद्ध चिनी आयात हुन्छ । नेपालमा वाषिर्क २२ करोड ६७ लाख किलो चिनी खपत हने अनुमान गरिन्छ । भन्सारको आयात तथ्यांकअनुसार झण्डै चार महिनालाई पुग्ने चिनी व्यापारीहरुले चालु आवको दुई महिनामै भित्र्याएका छन् ।
नेपाली उत्पादकले उत्पादन गरेको र सहुलियतमा सरकारले वितरण गर्ने चिनीको मौज्दात रित्तिएसँगै चिनीको आयात बढेको हो । चिनी व्यापारीको भर परेर अर्थमन्त्रालयले समयमै सहुलियतको चिनी खरिद गर्ने सहमति नदिँदा बजारमा अहिले सहुलियतको चिनीको आभाव हुन गएको छ ।
खाद्य व्यवस्था तथा व्यापार कम्पनी र साल्टट्रेडिङले ७२ रुपैयाँ किलोमा बिक्री गर्ने चिनी सकिएपछि चिनीको खुद्रा मूल्य एक सय रुपैयाँ हाराहारी पुगेको छ । आयात बढेपनि चिनीको मूल्य नघट्दा व्यापारीको नाफा बढेको छ भने अझ लामो समयलाई मौज्दात हुनेगरी चिनीको आयात हुँदा स्वदेशी चिनी नबिक्ने अवस्था सिर्जना हुन सक्ने देखिएको छ ।
नेपाली उत्पादकले वर्षिक एक लाख ७० हजार मेट्रिकटन हाराहारी मात्रै चिनी उत्पादन गर्ने गरेका छन् । साल्ट ट्रेडिङ र खाद्यले खरिद गर्ने सहुलियतको चिनी अझै आयात हुन सकेको छैन । स्वदेशी उत्पादनमा कमी र भारतबाट समयमा आयात हुन नसकेको कारण देशभरि चिनीको आभाव हुन गएपछि कालाबजारी बढेको छ ।
यो विषयमा आफ्नो प्रतिक्रिया दिनुहोस् !