जनकपुरधाम, असोज ६ गते । सुनचाँदीको गरह गहना चोरी तथा बेचबिखनको आरोपमा धनुषा प्रहरीले दुई जनालाई पक्राउ गरेको छ ।
असोज १ गते विश्वकर्मा पूजाको दिन जनकपुरधाम उपमहानगरपालिका ६ मा डेरा गरी बस्दै आएका मनोजकुमार तिवारीको डेरामा सुनचाँदीका गरगहना तथा नगद चोरी गर्ने र सो गहना खरीद गर्ने दुवैलाई पक्राउ गरिएको धनुषाका प्रहरी नायव उपरीक्षक मकेन्द्रकुमार मिश्रले जानकारी दिए ।
उनका अनुसार घटना सम्बन्धमा खोजतलाश गर्दै हिजो सोमवार चोरी आरोपमा धनुषाका क्षिरेश्वरनाथ नगरपालिका १ निवासी २५ वर्षिय जिवछ यादवलाई शंका आधारमा पक्राउ गरियो । निजसँग सोधपुछ गर्दै जाँदा क्षिरेश्वर नगरपालिका ५ स्थित न्यू शिवम् ज्वेलर्समा विक्री गरेको पता लाग्यो ।
सो पसलमा खानतलाशी गर्दा चोरी गरिएको चाँदीका पाउजु ६ थान, चाँदीका पलेट ३ थान फेला परेको उनले बताए । चोरी तथा बेचबिखन आरोपमा निज जिवछ यादव र न्यू शिवम् ज्वेलर्सका संचालक लक्ष्मण महतोलाई हिरासतमा राखिएको प्रहरीले जनाएको छ ।
तिवारीको घरबाट चोरी गरी ल्याइ विक्री गरेका चाँदीका गरगहना चोरी गर्ने जिवछ यादव र किन्ने लक्ष्मण महतोलाई नियन्त्रणमा लिइ जिल्ला अदालत धनुषाबाट चोरी मुद्दा शिर्षकमा म्याद लिइ थप अनुसन्धान अघि बढाइएको डीएसपी मिश्रले जानकारी दिएका छन ।
यो विषयमा आफ्नो प्रतिक्रिया दिनुहोस् !