जनकपुरधाम, असोज ४ गते । कोरोना संक्रमण महामारीको कारण महिनौदेखि बन्द रहेका जनकपुर काठमाडौ आन्तरिक विमान सेवा सोमवारदेखि संचालनमा आउने भएको छ ।
महामारीको त्रासका देशका आन्तरिक तथा बाह्य विमान सेवा सहित जनकपुरमा समेत बन्द गरिएको थियो । गत २४ मार्च २०२० देखि बन्द गरिएको आन्तरिक तथा अन्तर्राष्ट्रिय उडान सुचारु भएसंगै जनकपुर काठमाडौ विमान सेवा पनि संचालनमा आएको हो ।
नेपाल सरकारले कोरोना संक्रमणलाई रोक्न तथा न्युनीकरणका लागि बन्द गरेको आन्तरिक उडान असोज १ गतेदेखि निर्णय गरेको थियो । तर विमान वायुसेवा संघले क्षमताभन्दा आधा यात्रु बोकेर चलाउँदा घाटा लाग्न सक्ने भनेपछि स्थगित गरियो तर वायु सेवा निगम र नेपाल सरकारसँगको आपसी सम्झौतापछि असोज ५ गतेदेखि सञ्चालनमा ल्याउने निर्णय गरिएको हो ।
जनकपुरधामका लागि पहिलो उडान बुद्ध एयरको सोमबार बिहान साढे ११ बजे काठमाडौँबाट हुनेछ भने दोस्रो उडान यति एयरको अपरान्ह ३ बजे हुनेछ । कोरोनाका कारण बन्द रहेको उडान लामो समय पश्चात संचालनमा आउने भएपनि भाडादरमा बृद्धि गरिएको छैन । जनकपुर–काठमाडौंको भाडादर पहिलेको जस्तै ३ हजार ३ सय र ४ हजार मात्र रहेको बताइएको छ ।
सोमबारबाट सुचारु हुने आन्तरिक उडानमा यात्रुहरुले मास्क र पन्जा अनिवार्य लगाउनु पर्नेछ भने बिमान भित्र यात्रुले हातमा सानो ब्यागहरुमात्र लैजान पाउनेछन् । सबै यात्रुलाई ज्वरो मापनपछि मात्रै प्रवेश गर्न दिइने छ । यदि १००.४ फरेन्हाइट ज्वरो, सुख्खा खोकी र थकान जस्ता लक्षण देखिएमा त्यस्ता यात्रुलाई बिमानमा यात्रा गर्न दिइने छैन ।
यो विषयमा आफ्नो प्रतिक्रिया दिनुहोस् !