जनकपुरधाम, असोज ३ गते । प्रदेश २ का प्रदेश प्रमुख तिलक परियारले संविधान दिवस २०७७ को अवसरमा स्वदेश तथा विदेशमा रहेका सम्पूर्ण नेपाली जनताको नाममा शुभकामना व्यक्त गरेका छन ।
प्रदेश प्रमुख परियारले शनिवार शुभकामा सन्देश जारी गर्दै प्रदेशवासी सहित सम्पूर्ण नेपालीमा सुख, शान्ती, सुस्वास्थ्य एवं समृद्धिको कामना गरेका हुन ।
उनले नेपालको इतिहासमा पहिलोपटक जनप्रतिनिधि सम्मिलित संविधानसभाबाट २०७२ असोज ३ गतेबाट नयाँ नेपालको संविधान जारी भएको उल्लेख गर्दै जनआन्दोलन, जनयुद्ध, मधेश आन्दोलन र बलिदानले नेपालको संविधान आएको भन्दै ज्ञात, अज्ञात सहिदहरूप्रति भावपूर्ण श्रद्धान्जली अर्पण गर्दै वेपत्ता योद्धा, घाइते, अपाङ्ग र जेल–नेल पीडितहरुलाई उच्च सम्मान व्यक्त गरेका छन् ।
सो शुभकामना सन्देशमा ‘जनआन्दोलन, जनयुद्ध, मधेश आन्दोलन र विविध जनवर्गीय आन्दोलनहरूमा नेपाली जनताको लाखौंको सहभागिता, हजारौं बलिदानसहितको त्याग, तपस्या र रगत–पसिना बगाएर मात्र यो सम्भव भएको उल्लेख गरिएको छ ।
यसका साथै कोरोना भाइरसको महामारीले विश्वलाई नै आक्रान्त बनाएको अवस्थामा यसको रोकथाम र उपचारका लागि रातदिन खट्ने तीनै तहका सरकार, स्वास्थ्यकर्मी, सुरक्षाकर्मी, सञ्चारकर्मी, जनप्रतिनिधि र समाजसेवी सबैमा उनले धन्यवाद व्यक्त गरेका छन् ।
साथै, नेपाल सरकारका तीनवटै तहका सरकार तथा स्वास्थ्य संस्थाहरुबाट जारी भएका निर्देशनहरुलाई कडाइपूर्वक पालना गर्दै संयमतापूर्वक कोरोना भाइरस विरुद्ध लड्नका लागि सबैसँग अपिल समेत गरेका छन् ।
यो विषयमा आफ्नो प्रतिक्रिया दिनुहोस् !