जनकपुरधाम, भदौ २६ गते । आर्थिक वर्ष २०७७/०७८ का लागि प्रदेश २ को विनियोजित बजेटमा निकै छाडापन देखिएको छ ।
प्रदेश सरकारले विनियोजन गरेको बजेटमा तलब र अन्य कार्यक्रममा मनपरीका साथै प्रदेश सभाको सभामुख, उपसभामुख, सदस्य तथा सचिवाललयको भोजभतेर, भ्रमण तथा अतिथि सत्कारका लागि करीब ४ करोड रुपैया विनियोजन गरेको लोकपुकारले तथ्यांक फेला पारेको छ ।
प्रदेश सभाको भोज भतेरका लागि दुई शिर्षकमा ९८ लाख रुपैया छुटयाएको छ । लोकपुकार टीमले रातो किताबमा गरेको अध्ययन अनुसार प्रदेश सभाको वार्षिकोत्सवको लागि ५० लाख र सभामा हुने विभिन्न उत्सवमा भोज भतेरका लागि ४८ लाख रुपैया विनियोजन गरिएको छ ।
त्यस्तै अतिथि सत्कारमा एक करोड ५८ लाख ५६ हजार रुपैया विनियोजन गरेर ब्रम्हलुट नै मचाएको देखिन्छ । विनियोजित बजेट अनुसार प्रदेश सभा सदस्यको अतिथि सत्कारका लागि १० लाख २० हजार, पदाधिकारीको अतिथि सत्कार तथा चियापनका लागि ४८ लाख, सचिवालयको अतिथि सत्कारका लागि १५ लाख र छुट्टै अतिथि सत्कारका लागि ३२ लाख ४० हजार रुपैया बजेट छुटयाएको हो ।
विनियोजित बजेटको दस्तावेज अर्थात रातो किताबमा सभामुख सरोजकुमार यादवका लागि संसदीय निर्वाचन क्षेत्र बाहेक कानून विपरित निर्वाचन क्षेत्र विकास कार्यक्रम शिर्षक राखेर ३ करोड रुपैया उल्लेख गरिएको छ ।
कानूनतः मुख्यमन्त्री तथा मन्त्रिपरिषद कार्यालय अन्तर्गत सभामुख, उपसभामुख, मुख्यमन्त्री, मन्त्री लगायत सबै प्रदेश सभा सदस्यको एकमुष्ट रकम तोकि बजेट विनियोजित गरिन्छ । तर सभामुख यादवका लागि मुख्यमन्त्री कार्यालयबाट वितरित योजना बाहेक छुट्टै शिर्षक खडा गरी ३ करोड रुपैयाको बजेट विनियोजन गरिएको हो ।
त्यति मात्र होइन सभामुख, उपसभामुख, सदस्य र कर्मचारी सहितको भ्रमणका लागि मात्रै एक करोड ५ हजार रुपैया बजेट छुटयाइएको छ । रातो किताब अनुसार अनुमन मूल्यांकन सहितको भ्रमणको लागि ३० लाख ९६ हजार, सभामुख, उपसभामुख तथा प्रतिनिधिको आन्तरिक भ्रमणको लागि ४५ लाख, सचिवालय कर्मचारीको भ्रमण २४ लाख र निजामति कर्मचारीको भ्रमणका लागि साढे ४/४ लाखको दरले ९ लाख रुपैया विनियोजन गरिएको छ ।
यसका साथै बजेट विनियोजनमा प्रदेश सभाको मनपरी यहाँसम्म मात्रै सिमिति नभई प्रदेश सभामा खेलकुद स्थल कभर्ड हल निर्माणका लागि एक करोड रुपैयाका साथै हाल प्रदेश सभा भित्र पर्याप्त भवन भएपनि भवन मरम्मत, सम्भार, कालेपत्रे, कम्पाउण्डवाल र केही निर्माणको नाममा ५ करोड ६८ लाख रुपैया रकम छुटयाइएको छ ।
प्रदेश सभा हल विस्तारका लागि एक करोड, समिति सभापति र क्यान्टीन भवनको लागि ५० लाख, सुरक्षाकर्मी आवास ५० लाख, कार्यालयको भवनका लागि ६० लाख, सभा भवन मरम्मत सम्भार ३० लाख, कम्पाउण्डवाल निर्माण एवं तारबारका लागि २ करोड, सुरक्षा पोष्टका लागि ८ लाख, सभाभित्र कालेपत्रेका लागि ३० लाख, गेट निर्माणका लागि १० लाख र सभाभित्र ढल निर्माणका लागि ३० लाख रुपैया बजेट विनियोजन गरिएको हो ।
बजेट विनियोजनमा यी मनपरी प्रदेश सभामा मात्रै नभई प्रदेश सरकारका मुख्यमन्त्री सहित अन्य मन्त्रालय समेत विकास निर्माणको कार्यक्रम कटौती गरी भोग विलासिता र संवैधानिक व्यवस्था विपरित कार्यकर्ता पाल्ने उद्देश्यका साथ उपभोक्ता समितिमुखी बजेट प्रदेश सरकारले विनियोजन गरेको ।
यो विषयमा आफ्नो प्रतिक्रिया दिनुहोस् !