जननकपुरधाम, भदौ २१ गते । सर्लाही जिल्लामा गत तीन सातादेखि लगाइदै आएको निषेधाज्ञा हटाइएको छ ।
कोरोना संक्रमण फैलिन नदिने उद्देश्यले विगत तीन सातादेखि लगाइदै आएको निषेधाज्ञा जिल्ला प्रशासन कार्यालय सर्लाहीले सोमबारदेखि हटाउने निर्णय गरेको हो ।
जिल्ला विपद व्यवस्थापन समिति सर्लाहीको सोमबार बसेको बैठकले निषेधाज्ञा हटाउने निर्णय गरेको सर्लाहीका प्रमुख जिल्ला अधिकारी सुरेन्द्रकुमार पौडेलले जानकारी दिएका छन् ।
सर्वसाधारणको जीवन निर्वाह तथा एवं सामाजिक आर्थिक अवस्थालाई सन्तुलित बनाई राख्न व्यापार तथा रोजगारी हुने खालका कृयाकलापहरु संचालन गर्न दिइने निर्णय गरिएको उनले बताए ।
यद्यपि कोरोना संक्रमण फैलिन नदिन आवश्यक सुरक्षा मापदण्ड पालन गराउन लगाइने उनको भनाई छ । जिल्ला प्रशासन कार्यालय सर्लाहीले निषेधाज्ञा खुल्ला गरे पनि होटेल तथा मदिरा पसलहरु संचालनमा र हाट बजार तथा मेला आयोजनमा पूूर्ण रुपमा प्रतिबनध लगाइएको छ ।
उपभोग्य सामाग्री बिक्री गर्ने पसलहरु प्रत्येक दिन बिहान १० बजेदेखि बेलुका ५ बजेसम्म खोल्न दिइने निर्णय गरिएको छ । संघ संस्था, कार्यालय, वित्तिय संस्थाहरु पालिकागत हिसाबले पालो मिलाएर संचालनमा ल्ययाउन सूचनामा भनिएको छ ।
निषेधाज्ञा हटाइएपनि सामाजिक दुरी कायम गर्ने, भीडभाड हुन नदिइने लगायतका नियमहरु अनिवार्य रुपमा पालन गर्नुपर्ने कडा निर्देशन दिइएको प्रमुख जिल्ला अधिकारी पौडेलले बताए ।
यो विषयमा आफ्नो प्रतिक्रिया दिनुहोस् !