गौर, भदौ १८ गते । प्रहरी हिरासतमा मृत्यु भएका युवकको परिवारसँग भेटन गएका बेला प्रदेश २ का मुख्यमन्त्री लालबाबु राउतलाई रौतहटमा कालोझण्डा देखाइएको छ ।
गते केही दिनअघि रौतहटमा गोली हानी पुजारीको हत्या भएको घटनाका दोषीलाई प्रदेश सरकारले बचाउन खोजेको आरोप लगाउंदै बिहीवार युवाहरुले कालो झण्ड देखाएका हुन ।
‘पुजारी श्रीराम साहको हत्यारा बचाउने षड्यन्त्र बन्द गर’ ब्यानर बोकेका करिब ३०/४० जनाको समूहमा रहेका युवाहरुले मुख्यमन्त्री राउतलाई कालोझण्डा देखाउंदै उनी विरुद्ध नाराबाजी समेत गरेका छन ।
मुख्यमन्त्री राउत निरञ्जन रामको हत्यारमा आरोपमा पक्राउपछि प्रहरी हिरासतमै मृत्यु भएका विजय महराको परिवारसँग भेटघाट गर्न जाने क्रममा ती युवाहरुले कालो झण्डा देखाउंदै दोषीलाई उम्काउन मिल्दैन, तत्काल कारवाही गर भन्ने मांग गर्दै नाराबाजी गरेका छन ।
गत १४ दिन अगाडी पुजारी साहको एक समूहले गोली हानेर हत्या गरेको थियो । हत्यामा संलग्न दुई जनालाई प्रहरीले पक्राउ गरी अनुसन्धान तथा कारबाही अगाडी बढाइसकेको छ । हत्यामा संलग्न केहि व्यक्ति अझै फरार रहेको र उनीहरुको पनि खोजी भइरहेको प्रहरीले जनाएको छ ।
यसैबीच प्रहरी हिरासतमा मारिएका विजय रामलाई न्याय दिलाउन इलाका प्रहरी कार्यालय गरुडा अगाडी जारी रहेको धर्ना प्रदर्शन विथोल्न प्रहरीले गरेको लाठी चार्जबाट दुई महिला प्रदर्शनकारी घाइते भएका छन । अनशनकारी महिला घाइते भएपछि स्थानीय युवाहरुले गरेको ढुंगामुढा प्रहारमा प्रहरीहरु समेत घाइते भएका छन ।
प्रदर्शनकारीहरुले प्रहरीमाथि एक्कासी ढुंगामुढा गर्न थालेपछि आत्मरक्षा र अवस्थालाई नियन्त्रणमा लिन प्रहरीले गरेको लाठी चार्ज र अश्रुग्यास प्रहारको क्रममा दुई अनशनकारी महिला घाइते भएको जिल्ला प्रहरी कार्यालय रौतहटले जनाएको छ । घाईते भएकी महिलाको स्थानीय अनामिका अस्पतालमा उपचार भईरहेको संघर्ष समितिका सदस्य रबि रामले बताएका छन ।
प्रहरी यातनाको कारण विजय महराको मृत्यु भएको भन्दै भदौं ११ गते देखि चरणबद्ध रुपमा आन्दोलन गर्दै आएका निरञ्जन राम र विजय राम संयुक्त जिल्ला संघर्ष समितिका कार्यकर्ताहरु प्रहरी कार्यालय अगाडि धर्ना दिदै आएका छन ।
सोही क्रममा विहिवार साँझ साढे ५ बजेको समयमा इप्रका गरुडा माथि ढुंगामुढा गर्न थालेपछि प्रहरीले आत्मरक्षार्थ लाठी चार्ज तथा अश्रुग्यास प्रहार गर्नु परेको प्रहरीको प्रवक्ता एवं डिएसपी भरतबहादुर श्रोष्ठले बताएका छन ।
यो विषयमा आफ्नो प्रतिक्रिया दिनुहोस् !