जनकपुरधाम, भदौ १७ गते । चैत ११ गतेदेखि शुरु भएको लकडाउन यता प्रदेश २ मा २ सय ७४ जनाले आत्महत्या गरेको छ ।
कोरोना संक्रमणले गर्दा यो बुधवारसम्म ९५ जनाको ज्यान गएको छ भने लकडाउनले उब्जाउको समस्या तथा अन्य कारणले प्रदेशमा २ सय ७४ जनाले आत्महत्या गरेको हो ।
प्रदेश २ प्रहरी कार्यालयको तथ्यांक अनुसार प्रदेशमा कुल २ सय ७४ आत्महत्या मध्ये एक सातामै ४४ जना रहेका छन । सो तथ्यांक हेर्दा कोरोना संक्रमण भन्दा पनि आत्महत्याको घटना भयावह बन्दै गएको छ ।
कोरोना संक्रमण नियन्त्रण तथा रोकथामका लागि नेपाल सरकारले लागू गरेको लकडाउनले गर्दा उत्पन्न विषम परिस्थितिले प्रदेशमा आत्महत्याको घटना निरन्तर बढ्दै गईरहेको छ । प्रवक्ता अंशु कुमार सिंहका अनुसार लकडाउनले उब्जाएको समस्या बाहेक अन्य कारणले पनि आत्महत्या घटना बढदै गइरहेको हो ।
गत चैत्र ११ देखि भदौ १६ गतेसम्म २ नम्बर प्रदेश प्रहरी कार्यालयमा महिला तथा घरेलु हिंसातर्फ दर्ता भएको विवरण अनुसार आत्महत्या गर्नेमा वृद्धादेखि बालिकासम्म रहेका छन् । मुद्दा कम दर्ता भएको प्रहरीको तथ्यांकले देखाएपनि घटना भने लकडाउनको समयमा धेरै भएको प्रदेश प्रहरी कार्यालयका प्रवक्ता प्रहरी नायब उपरिक्षक सिंहले बताएका छन ।
जिल्लागत तथ्याङ्क हेर्दा लकडाउन अवधि भरमा सप्तरीमा ३४, सिरहामा ४७, धनुषामा ५१, महोत्तरीमा २०, सर्लाहीमा ३५, रौतहटमा ३०, बारामा ३१ र पर्सामा २६ जनाले आत्महत्याको उजुरी परेको हो । तर एक सातामा भन्ने हो भने सप्तरीमा २, धनुषामा ९, रौतहटमा १३, बारामा १६, पर्सामा ६ जनाले आत्महत्या गरेका हुन ।
त्यस्तै लकडाउन अवधिमा घरेलु हिंसा ७ सय ९२ वटा घरेलु हिंसाका उजुरीहरु परेका छन् । सप्तरीका ४४, सिरहाका १ सय ७, धनुषाका १ सय ८१, महोत्तरीका ४५, सर्लाहीका ७, रौतहटका १ सय ७, बाराका १ सय ६१ र पर्साका १ सय ३६ जनाले घरेलु हिंसा सम्बन्धी घटना भएको प्रहरीले जनाएको छ ।
जबरजस्ती करणीतर्फ १ सय ३७ वटा घटना उजुरी परेको छ भने जबरजस्ती करणी उद्योगका २७, बहुबिबाह सम्बन्धी घटनाको २१, बालबिबाह ४, अवैध गर्भपतन ५, बोक्सीको आरोप सम्बन्धी ८, बालयौन दूराचार १६ र अप्राकृतिक मैथुन सम्बन्धी ३ वटा उजुरी परेको प्रदेश प्रहरीले जनाएको छ ।
यो विषयमा आफ्नो प्रतिक्रिया दिनुहोस् !