जनकपुरधाम, भदौ १७ गते । एकैपटकमा चार बच्चा (चौम्ल्याहा) जन्म दिने धनुषाको विदेह नगरपालिका ७ जोगियाराकी महिलाको मृत्यु भएको छ ।
जनकपुरधामस्थित काव्या अस्पतालमा मंगलबार चौमल्याहा बच्चाको जन्म दिएकी २२ वर्षिय अरमाना खातुनले बुधवार मृत्यु भएको हो । अरमानाले तीन छोरी र एक छोराको जन्म दिएकी थिइन ।
एकैपटकमा चारवटा बच्चा जन्माएपछि उनको स्वास्थ्य अवस्था गम्भीर बनेको थियो । उनको फोक्सोमा पानी तथा खुनको मात्रा जमेर पलमन्ड्री एडिमा देखिएपछि हिजोदेखि नै डाक्टर अजय यादवको निगरानीमा भेन्टिलेटरमा राखेर उपचार भईरहेको थियो ।
प्रसुती व्यथा लागेपछि मंगलबार बिहान जनकपुरधामस्थित काव्या अस्पतालमा भर्ना भएकी अरमानालाई स्त्री तथा प्रसुती रोग विशेषज्ञ डाक्टर सोनिया सिंहले शल्यक्रिया मार्फत बच्चाहरु निकालेकी थिईन् ।
शिशुहरु मध्ये छोराको तौल डेढ किलो र छोरीहरुको तौल सवा एक किलो रहेको छ । शिशुहरुको अवस्था समेत अस्थिर देखिएको र अहिले चारै बच्चाहरुलाई आइसियुमा राखेर उपचार भईरहेको काव्या अस्पतालका सञ्चालक डाक्टर एसके सिंहले जानकारी दिएका छन ।
यो विषयमा आफ्नो प्रतिक्रिया दिनुहोस् !